Georgius Prenner artium et decretorum doctor ac curie Patauiensis infra Anesum in spiritualibus vicarius et officialis generalis et ad ad [!] infrascripta a reverendissimo domino Patauiensi commissarius specialiter deputatus universis et singulis dominis presbiteris curatis et non curatis salutem in Domino. Ad beneficium capelle hospitalis sancti Martini in Zwetl vacantem per obitum domini Iohannis Schiechsschmidt ultimi et immediati rectoris eiusdem ad presentationem venerabilis viri domini Iohannis Graf rectoris ecclesię parrochialis ibidem, ad quem ius presentanti ratione dicte sue ecclesie parrochialis pertinere dinoscitur, dilectum in Christo dominum Steffanum Irrer presbiterum Pataviensis diocesis rectorem instituimus ipsumque per libri traditionem, ut moris est, in persona dilecti in Christo Thome Lindner investivimus de eodem, curam necnon administrationem spiritualium et temporalium sibi in eo plenarie committentes. Quocirca vobis dominis presbiteris supradictis, qui presentibus requisiti fueritis, committimus et mandamus, quatenus andictum dominum Stephanum principalem aut eius legitimum in hac parte procuratorem in et ad prenominati beneficii corporalem et actualem possessionem iuriumque et pertinentiarum omnium eiusdem inducatis et inductum defendatis, amoto exinde quolibet illicite detentore, facientesque sibi de fructibus, redditibus, proventibus, iuribus et obventionibus universis ad dictum beneficium spectantibus ab omnibus, quorum interest, integre responderi, contradictores et rebelles quoscumque auctoritate nostra per censuram ecclesiasticam firmiter compescendo. Harum testimonio litterarum sigilli officialatus maioris appensione communitarum. Datum et actum Wienne decima octava die mensis septembris anno etc. decimo.

Source Fulltext: Mag. Klaus Birngruber, Dr. Herwig Weigl