Ich Mertt Óbrecht und mein hausvrawe und all unser erben, wir vergehen und tun chunt offenleich mit disem brif, daz uns die erbern purger dacz Zwetel von ierm spital daselbs einen weingarten lazzen habent ewichleichen zue pawn, der gelegen ist dacz Levbs¹ under dem Wograin² in der Prevndleins praytten, des ein halbs ieuch ist, und habent daz getan mit irs perchherren hant hern Dyetreichs, zue den zeiten pfarrer dacz Sand Nicla³, dem seu den vorgenanten weingarten selb verdien sulln, ym oder wer pfarrer dacz Sand Nicla ist, als unser brif sait, den wir von in haben; also beschaidenleich, daz wir den vorgenanten weingarten ewichleich pawn sulln und waz Got ierichleich dar inn geit, da sull wir in von raichen und geben zue irm vorgenanten spital alleweg den drittail, und sulln auch den weingarten nicht lesen, ez sey denn ier pót oder von ierm spital ein gewisser pot dapey, und sulln den wein auch fueren zu einer press, wo uns ir pot hin zaigt. Ob wir daz ind(er)t widerspraechen, so sey wir dem richter in dem Aygen vervalln zu wandel czwen und sibenczig Wienner pfenning. Wir loben in auch mit unsern trewn, den vorgenanten weingarten zu pawn czu allem paw, als man weingarten verrecht pawn sol. wo wir des nicht teten, so sol in der vorgenant weingart hin wider erben und gevallen zu irm vorgenanten spital mit unserm gutleichem willen. Seu habent uns auch erlawbt, mit dem weingarten alln unsern fruem damit schaffen zu verseczen, zu verchauffen und geben, wem wir welln, an all ierrung in alle dem rechten, als wir uns des selb verpunden haben zu pawn. Wer aber, daz der vorgenant weingart in uenser gewalt unverchauft belib als lang unczt unser nimer wer, so sol in der egenant weingart hin wider erben und gevalln zu irm vorgenanten spital dacz Zwetel. Daz die sache furbas stet und unczebrochen beleib, daruber geb wir in disen oeffen brief versigelten mit des vorgenanten hern Dytreichs insigel, zu den zeiten pfarrer dacz sand Nicla, und mit dez erbern manns insigel Petreins an dem Anger, die wier darumb gepeten haben, daz si irev insigel fur uns an disen brief gehangen habent in an schaden. Der brif ist geben nach Christs gepurd drewczehen hundert iar in dem zway und sechczgistem iar an Sand Gorigen tag.