Ich Katherei, der herren swester hern Rapots vnd hern Haidenrichs der pvrchgrafen von Gors, tvn chvnt allen den, di disen Brief lesent oder hoerent lesen, di nv lebent vnd hernach chvnftig sint, daz ich mit verdahtem mvet vnd mit rat vnd mit gvnst meiner prveder, der vorgenanten herren, hern Rapots vnd hern Haidenreichs, wolmaehtich dennoch meiner süne vnd meiner rede, baide dvrch hail meiner vodern seel vnd ovch meiner seel, han geschaffet vnd gegeben dem gotshovse ze Altenburch vnd den erbern gaistlichen levten, di dasaelbe got taeglich dienent, meinen weingarten, den ich chovffet vmb mein beraitez gvet, der ze Schoenberche leit an der Wort vnd ist genant div Setze, vnd dient Gotfriden dem Taschen alle iar an sand Cholmans tag vier Wienner pfenning vnd niht mêr, ledichlich vnd vreilich ze haben mit sogetaner beschaidenhait, daz di lieben gaistlichen levt in got des vorbenanten gotshovses von dem vorbenanten weingarten mir mein pilaitte, meinen svbinten, meinen dreizzigisten, vnd hinfver alle iar, schvllen begên meinen iartag, vnd schvllen bitten vmb meiner vodern sel in ir rainen andaht, als ovch si des loen wellen enphohen von dem almaehtigen got. Vnd daz ditze mein geschaefte staet beleibe vnd vnzebrochen dem vorgenanten gotshovse vnd den gaistlichen levten des saelben gotshovses, des gib ich in disen brief zv einem sihtigen vrchvnd vnd zv einem waren gezivge vnd zv einer ebigen vestenvng diser sache, versigelten mit meiner prveder insigel, hern Rapots vnd hern Haidenreichs, der pvrchgrafen von Gors, di ovch diser sache gezivge sint mit ir insigelen. Diser brief ist gegeben, dv von Christes gebvrt waren ergangen drivtzehen hvndert iar, darnach in dem ahtzehenden iar ze Pfingsten.

Source Fulltext: BURGER, Urkunden Altenburg (=FRA II/21, 1865) S. 140