Ich Levtwein von Svnneberch vnd jch Diemuet sein hausvrawe uergechen vnd tuen chvnt allen den, die disen prief lesent oder horent lesen, die nv sint oder hernach chvmftig werdent, daz wier mit uerdachtem muet vnd mit guetem willen vnd gunst vnsers suns Vlreiches vnd aller vnser gerben, vnd mit gesamter hant vnd mit zeitigem rot vnserr ureunt, ze der zeit do wier iz wol getven mochten, uerchauft haben vnsers rechten aigens siben ievchart akchers auz vnserm hof datz Manlebern dem erbern herren apt Seifriden vnd der samnug datz Altenburch, ze verchauffen, ze versetzen vnd geben, swem sev wellen, an allen irrsal, vm fumf vnd zwainzich phunt vnd vm ein halbez phunt phennig Wienner muniz, der wier aller recht vnd redleich gewert sein. Vnd darzve durich pezzer sicherhait ditz chauffe, so wil jch egenanter Levtwein vnd mein egenanter svn Vlreich vnd mein veter her Hadmar der Svnneberger von Raschenla des vorgenanten guetes rechter scherm sein fur alle ansprach, als aigens recht ist vnd des landes gewanhait in Ostereich. Vnd daz der chauf vnd die sach stett vnd vnzebrochen ebichleich beleib, so geb wier, jch vorgenanter Levtwein von Svnneberch vnd jch Diemvet sein hausvrawe, dem egenanten herren apt Seifriden vnd der samnug datz Altenburch disen prief zv ainem offen gezevg vnd zv ainer ebigen vestung diser sach, uersigelt mit meinem jnsigel vnd mit meines vetern jnsigel, hern Hadmares des Svnneberger von Raschenla. Diser sach sint gezeug: her Rapot der purgraf von Gors, her Haidenreich sein prueder, her Chraft von Svnneberch, her Alber hern Rapotes svn von Gors, die erbern dienstherren in Ostereich; Vlreich der Helphant von Svltz, Perichtolt der Molter, Niclos des schreiber svn von Ekreistorf, vnd ander frum leut genueg, den die sach vnd der chauf wol chunt ist. Diser prief wart geben, do von Christes puert ergangen waren drevzechen hundert jar, darnach in dem nevnzechenten iar, an sand Gorgen tag.

Source Fulltext: BURGER, Urkunden Altenburg (=FRA II/21, 1865) S. 142-143