Ich Gorig van Meyreis, vnd ich Fridreich sein prueder, vergechen vnd tuen chvnd allen den, di nv sint oder hernach chvnftich werdent, di den prief lesent oder horent lesen, daz wier mit wol verdochtem muet vnd mit guetem willen vnser vnd aller vnser erben verchauft haben dem gotzhaus datz Altenburch vnsers rechten aygens anderhalben metzen magengultz vm vierdhalbphunt phenning Wiener mvnz, der wier aller recht vnd redleich gewert sen, vnd leit daz selbe gult auf anderhalben lechen datz Holenstain. Vnd wen wier selb nicht aigener jnsigel haben, geb wier dem vorgnanten gotzhaus den prief ze einer pezern sicherhait vnd zv einer ewigen bestetigvng diser sache, versigelt mit hern Chvnratz vnsers prueder jnsigel, vnd mit vnsers ochems hern Albers van Chirichperch jnsigel, vnd mit vnsers geswein Dietmars van Chadav jnsigel. Diser sache zevg sint: her Vlreich van Peygarten, her Hainreich van Pernhartstorf, Hainreich der Topler, Wolfhart van dem Gotschalichs, vnd ander piderb leut gnuech, den di sache wol chund ist. Diser prief ist geben nach Christ puert vber dreutzechen hundert jar, dornach in den zway vnd zwaintzgisten jar, an sand Andres tag, datz Altenburch in dem chloster.

Source Fulltext: BURGER, Urkunden Altenburg (=FRA II/21, 1865) S. 160