Wir Albrecht von gots gnaden hertzog ze Österreich, ze Stejer, ze Kernden vnd ze Krain, graue ze Tyrol etc., bechennen, als die erbarn gaistleichen, vnser lieben andechtigen vnd getrewn, der abbt vnd der conuent ze Altenburg von Niklasen dem Langenawer habent gekaufft ayn lehen vnd zwo hoffstett, gelegen ze Vlreichslag, dauon man jerleich dient newn schilling vnd sechs phening, die desselben Niklasen lehen von vns waren, vnd die er vns dazemal aufgab, daz wir zeuorderst durch gots, vnd derselben klosterleutt vleissigen pet willen vnd auch von sundern gnaden dem vorgenanten irem gotzhaus ze Altenburg dasselb lehen vnd die hofstett mitsambt der obgeschriben phening gült vnd ander zugehörunge geaigent haben, vnd aignen auch die darzu von fürstlicher macht, wissentlich mit dem brief jn sölicher masse, daz die nu fürbasser ewikleichen dabei beleiben als andere aigne güter die darzu gehörent, als aigner güter vnd landes recht ist, vngeuerlich. Mit vrkunt ditz briefs, geben ze Wienn, am Samtztag vor allerhailigen tag, nach Kristi gepurt in dem viertzehenhundertisten jare. Dominus dux per se.

Source Fulltext: BURGER, Urkunden Altenburg (=FRA II/21, 1865) S. 285-286