Leonardus, dei et apostolice sedis gratia episcopus Patauiensis, dilecto in Christo rectori ecclesie parochialis in Horn aut eius locumtenenti nostre dioecesis salutem in domino. Quia ad perpetuam vicariam ecclesie sancti Nicolai in Rietenburg eiusdem nostre dioecesis vacantem ad presens per liberam dimissionem dilecti in Christo Johannis Kolb presbyteri vltimi et immediati rectoris eiusdem ob assecutionem alterius beneficii dilectum in Christo Andream Hohenberger, clericum dicte nostre dioecesis, ad presentationem venerabilis in Christo sincere dilecti Conradi abbatis monasterii sancti Lamberti in Altenburg ordinis sancti Benedicti memorate nostre dioecesis, ad quem jus presentandi supradicte vicarie pertinere dinoscitur, rectorem instituimus per presentes, psumque per libri traditionem ut moris est presentialiter inuestiuimus de eadem curam animarum et administrationem spiritualium et temporalium sibi in ea plenarie committens. Quapropter tibi in virtute sancte obedientie firmiter committimus et mandamus, quatenus supradictum Andream aut eius in hac parte legitimum procuratorem in et ad corporalem possessionem supranominate perpetue vicarie ecclesie in Rietenburg, iuriumque et pertinentiarum omnium eiusdem inducas et inductum defendas, faciasque sibi de fructibus redditibus proventibus iuribus et obuentionibus vniversis ad dictam vicariam perpetuam spectantibus ab omnibus quorum interest, integre responderi, contradictores et rebelles quoscunque auctoritate nostra per censuram ecclesiasticam firmiter compescendo. Datum Patavie, vicesima prima die mensis Januarii, anno domini millesimo qnadringentesimo tricesimo quinto.

Source Fulltext: BURGER, Urkunden Altenburg (=FRA II/21, 1865) S. 311-312