Leo episcopus, seruus seruorum dei, dilectis filiis Andree abbati et conuentui monasterii in Altenburg, ordinis sancti Benedicti, Patauiensis dioecesis, salutem et apostolicam benedictionem. Exposvit uestre deuotionis sinceritas et religionis promeretur honestas, ut tam nos, quos speciali dilectione prosequimur qua monasterium uestrum in Altenburg ordinis sancti Benedicti Patauiensis dioecesis, dignis honoribus attolamus. Cum itaque sicut exhibita nobis nuper pro parte uestra petitio continebat, abbas pro tempore existens dicti monasterii baculo pastorali annulo cirotecis et sandaliis ex speciali sedis apostolice priuilegio uti consueuerit, nos uolentes uos fauore prosequi gratie amplioris uestris in hac parte supplicationibus inclinati, vt tu fili abbas et successores tui abbates prefati monasterii, qui pro tempore fuerint, etiam mitra dalmatica et quibuscunque aliis pontificalibus indumentis ornamentis et insigniis uti ac tam in dicto monasterio quam quibusuis ecclesiis eidem monasterio subiectis quamvis pleno iure non subsint ac etiam dum pro tempore uacant, ad uestram presentationem pertinentibus necnon in quibus aliquam superioritatem obtinetis, in quibus te fili abbas et successores prefatos in pontificalibus pro tempore celebrare contigerit, benedictionem solemnem post missarum vesperarum matutinarum et aliorum diuinorum officiorum solemnia in habitu et ornatu pontificalibus supra populum inibi tunc interessantem dummodo in ecclesiis huiusmodi aliquis antistes uel dicte sedis legatus presens non sit uel si presens fuerit, eius ad id expressus accedit assensus elargiri, necnon ymagines cruces ac omnia et singula paramenta et ornamenta ecclesiastica etiam sacerdotalia ac campanas uasa et tabernacula etiam pro consecratione eucharistie ac reliquiarum monasterii et predictarum ac quarumcunque aliarum ecclesiarum ad usum missae et diuinorum officiorum seu cultum diuinum necessaria benedicere ac eiusdem monasterii et alias quascunque seculares et regulares ecclesias eidem monasterio subiectas et ad uestram presentationem pertinentes ac in quibus aliquam superioritatem obtinetis ut prefetur, illarumque cimiteria et alia loca ecclesiastica sanquinis aut seminis effusione aut alias quouismodo pollutas et polluta aqua tamen prius per aliquem catholicum antistitem ut moris est benedicta reconciliare necnon omnes et singulos monachos nouitios et seruitores dicti monasterii ac quoscunque uobis mediate uel imediate subiectos clericali caractere insignire et ad quatuor minores ordines simul aut separatim prout expediens fuerit statutis a iure temporibus promouere et dictos ordines eis conferre liberi et licite possitis, felicis recordationis Alexandri pape IV. predecessoris nostri, que incipit "Ablutes", et aliis apostolicis ac in prouincialibus et sinodalibus conciliis editis generalibus uel specialibus constitutionibus et ordinationibus ceterisque contrariis nequaquam obstantibus, tibi et eisdem successoribus ac uniuersis Christi fidelibus benedictioni huiusmodi ut prefertur elargiende pro tempore interessentibus, ut quotiens eidem benedictioni interfuerint, indulgentiam centum dierum consequi possint, auctoritate apostolica tenore presentium de speciali gratia indulgemus, per hoc autem constitutioni, que reconciliationem huiusmodi per episcopos tantum fieri precipit, nullum uolumus imposterum preiudicium generari. Nulli ergo omnino hominum liceat hanc paginam nostrorum indulti et uoluntatis infringere uel ei ausu temerario contraire. Si quis autem hoc attemptare presumpserit, indignationem omnipotentis dei ac beatorum Petri et Pauli apostolorum eius se nouerit incursurum. Datum Rome apud sanctum Petrum, anno jncarnationis domini millesimo quingentesimo sexto decimo, quarto Kal. Decembris, pontificatus nostri anno quarto. C. Ap. — Jo. Camilotta m. p. — Visa Jo. Madrigel. — n. Bagattinus. — aPn. Marciaci + XIII.

Source Fulltext: BURGER, Urkunden Altenburg (=FRA II/21, 1865) S. 369-370