Ich Wulfing von dem Gerlos vergihe und tun chunt allen den, di disen prief sehent oder hoerent lesen, di nu lebent und hernach chunftich sint, daz ich gesatz hette den erbaern apt und die samnunge von Chotweich und den erbaern probest Echarten und die samnunge von Sand Poelten mit sampt ir prieven an die juden von Sand Polten ir ieglichen für zwai hundert phunt phenninge und für zwai min vierzich phunt phenninge Wienner mu^entz, dafür ich sie reht und redlich gelediget und geloeset han aller dinge, und tun auch chunt, daz ich sie nihtes zeihe dan lieb und gut und danck in vleizchlichen der triwen und aller triwen, di si mir getan habent, die ich immer umb sie dienen wil, dieweil ich lebe mit leibe und mit gute, und gib in daruber diesen prief ze ainem urchunde und ze ainem geziuge versigilten mit meinem insigil. Und sint auch des geziug: her Chalhoch von Eberstorf, her Liupolt von Sachsengange, her Chunrat von Praitenvelde, her Hainrich sein pruder, Praun von Himperch und ander bidirbe leute genuch. Dieser prief ist geben ze Wienne an sand Michelsabunt, do von Christes geburt waren ergangen tausent iar zwai hundert iar in dem achten und niunzigistem iare.

Source Fulltext: FUCHS, Göttweig I (=FRA II/51, Wien 1901) S. 225-226