Reverendis in Christo dominis et amicis ac fratribus predilectis domino Wulfingo venerabili abbati, domino Martino priori totique conventui ecclesie Choetwicensis Ekhardus dei gracia abbas, Richerus prior totusque conventus monasterii Admontensis cum devotis oracionibus reverenciam fidem spem universa hec confirmante fraterna karitate in filio virginis gloriose. Cum ex sentencia Salomonis etc. Cum ergo domini et fratres karissimi de nostris sanctis oracionibus ac aliis religionis operibus nostram negligenciam ac bonorum operum inopiam speremus pleniter ac uberius reformari, karitati vestre per presentes plenum participium missarum oracionum ieiuniorum vigiliarum ac onmium bonorum operum, que in nostro monasterio a nostra fragilitate poterint perpetrari, liberaliter ac hylariter fraternitatis nomine condonamus hac condicione inserta, ut quemcunque fratrum vestre ecclesie sacerdotem vel dyaconem dominus vocaverit huius carnis terminum ad extremum, camerarius sive alter, qui habet ordinare de vestibus mortuorum, precium baiulo de ipsis vestibus defuncti tribuat, qui nobis mortem suam adnunciet tempore oportuno. Et tunc prior noster sive vicem sui gerens mane capitulum convocabit et nobis indicet, ut in vespere sollempniter conpulsetur et maior vigilia dicatur pro eodem et in mane missa pro defunctis cum choro tonaliter celebretur singulis sacerdotibus missam nichilominus legentibus in sequestro. Et si diem illam, in qua defunctus adnunciatus fuerit, festum aliquod vel legitimum negocium inpedierit, sequenti die, quod neglectum est, diligencius suppleatur et si aliquem illa die ex sacerdotibus vacare contigerit, quantocius eandem negligenciam suppleat, quando potest. Alii vero sacerdocii karakterem non habentes, unum legant psalterium, conversi vero et sorores mille dicant: pater noster, salutacionem beate virginis cuilibet adiungentes. Sacerdoti vero defuncto sive dyacono una prebenda eodem die, videlicet deposicionis sue, que consuevit clari sacerdotibus sive dyaconibus, duobus scolaribus legentibus unum psalterium tribuatur. Si vero in inferioribus ordinibus constituti videlicet subdyaconi acoliti conversi et sorores viam universe carnis ingressi fuerint, iterum nobis adnuncietur et vigilias et missam unam celebrabimus in communi. Et ne pie recordationis predecessores fratres sacerdotes ac cuiuscunque condicionis vestre et nostre ecclesie a tali pie devocionis voto aliquo modo separentur, statuimus, ut sexta feria festum omnium sanctorum proxime subsequente singulis annis sollempniter cum vigilia et missa ipsorum defunctorum ac virorum fundatorum ac benefactorum celebretur memoria specialis singulis sacerdotibus nichilominus legentibus in sequestro, aliis vero infra sacerdocium constitutis explentibus, que sunt superius adnotata ita, quod eodem die quatuor prebende dominorum pauperibus in remedium et levamen omnium fidelium defunctorum plenariter largiantur. Volentes eciam ut festivitas nostri fundatoris videlicet beati Gebhardi singulis annis eodem, quo occurerit die, aput vos cum septem luminibus peragatur fratribus quoque de collegio existentibus, in die vestri fundatoris videlicet beati Altmanni eandem prebendam dari procurabimus, quam eisdem in die nostri fundatoris beati Gebhardi videlicet in die sancti Viti iuxta ritum et consuetudinem nostre ecclesie consuevimus exhibere. Et ne hec fraternitatis inter nos et vos coniunctio ab aliquo in posterum valeat irritari vel in oblivionem devolvi presentem paginam vobis damus sigillorum nostrorum robore communitam ita, quod versa vice nobis litteras vestras sigillis munitas remittatis convencionem fraternitatis huiusmodi confirmantes. Acta sunt autem hec anno domini millesimo trecentesimo tricesimo septimo in die sancti Vrbani pape et martiris.

Source Fulltext: FUCHS, Göttweig I (=FRA II/51, Wien 1901) S. 371-372