Nos Albertus dei gracia dux Austrie, Stirie et Karinthie, dominus Carniole, Marchie ac Portus Naonis, comes in Habspurkch et Chyburkch necnon lanntgravius Alsacie superioris dominusque Phirretarum presenti pagina constare volumus tam presentibus quam futuris, quod cum dilectus genitor noster dominus Albertus illustris dux Austrie et Stirie privilegium dederit ecclesie Gottwicensi, quatenus ei de eiusdem ecclesie possessionibus ducenti modii avene pro iure advocacie ab abbate illius loci annuatim solverentur, nos vestigiis patris nostri in hac parte adherere volentes iam dicte ecclesie in reconpensam predictorum serviciorum, quemadmodum pater noster, sic * nos indulsimus et presentibus indulgemus, quatenus nullus umquam hominum sub nomine advocati aut iudex aut preco de nostra permissione sive alicuius officii vel iudicii occasione eisdem fratribus in possessionibus ipsorum nec citra vel ultra Danubium iniuriam inferat vel offendere presumat, nisi forte aliquis morte condempnandus in bonis ipsorum repertus fuerit, quem tamen iudex noster auctoritate propria non usurpabit, sed retentis bonis illum, sicut cingulo accinctus fuerit, nostro iudici homines ecclesie assignabunt. Statuimus eciam locum et tempus assignationis predicti pabuli videlicet ante festum beati Michaelis archangeli ad granarium nostrum Wienne sub communi et debita eiusdem civitatis mensura per abbatem predictum assignandum,^a ne alicui marschalco eis iniuriam vel dampnum inferendi occasionem tribuamus. Ut autem hec rata et firma permaneant, presentes litteras nostras* sigilli nostri appensione fecimus communiri. Datum Wienne anno domini millesimo tricentesimo quadragesimo, sexta feria post octavam epiphanie.

Source Fulltext: FUCHS, Göttweig I (=FRA II/51, Wien 1901) S. 383