Wier Purchart purkgraf ze Maydwurch und graf ze Hardekze den zeiten haubtman ze Chrems, veriehen offenbar an dem prief allen den, die in sehent oder ho^erent lesen, ubm den chrieg, der gewesen ist zwischen dem erwern geystleichen herren abpt Wulfingen ze dem Cho^etweig und Rachim dem juden ze Chrems auf seinem haws und der zwair hofstet dopei und umb daz versezzen purchrecht. Dezseiben chrieges gab uns mein herr hertzog Albrecht ze einem verho^erer und chomen fu^er uns dez vorgenanten herren abpt Wulfingez pfleger, her Symon ze den zeiten probst ze Stayn und Rachim der jud und namen dez chrieges ze schidleiten mit guetleichem willen paider tail Hainreichen den Neunhouer unserm hofrichter und Muschen den juden ze Chrems. Di sprachen uber den chri^eg und schieden dem juden von der hofstat, di an seinem haus leit, den hof halben ze seinen haws und daz der jud furbaz an allen chrieg von demselben halben hof und von seinem haws, daz do haist der Chuniginne haws, dem vorgenanten gotzhaws ze Cho^etweig aller ierchleich raichen und dienen schol oder wer daz haws innehat, segsundvi^ertzk phenning Wienner gemainer munzz ze purchrecht, drei und zwaintzk an sand Mertentag und drei und zwaintzk an sand Go^ergentag. Daz die sache alzo vor uns gewandelt sei, dez geben wi^er dem vorgenanten herren abpt Wulfingen und seinem gotzhaws ze Chotweig disen offen prief versigelten mit unserm anhangunden insigel der sache ze einem getzeug. Dartzue sind auch getzeug mit iern insigeln Haynreich der Neunhouer, unser hofrichter ze den zeiten, und Jans von Weytra ze den zeiten^a judenrichter ze Chrems. Der pri^ef ist gegeben, do man zalt von Christes gepuerd dreutzehenhundert jar darnach in dem vier und viertzkisten iar an aller heyligen tag.

Source Fulltext: FUCHS, Göttweig I (=FRA II/51, Wien 1901) S. 408-409