Ich Paul der Sitzendarffer und ich Margret sein hausvraw^e und alle unser erben wi^er veriehen offenleich an dem prief und tu^en chunte allen den, die in sehent oder ho^erent lesen, die nu lebent und hernoch chu^enftige sint, daz wi^er mit wolverdochtem muet und mit gunste und mit guetem willen mein egenanten Pauln prueder Ott^en und Niclasse und Pilgreims der Sitzenda^erffer und aller unser erben und mit rat unser pesten vreunt mit gesampter hant zu der zeit, do wi^er iz wol getu^en machten, verchaufte haben unsers rechten vreyn aygens dritthalbe phunt phenninge geltez und sibentzehen phenninge geltez datze Gokkenda^erf auf zwain lehen und auf einer ho^efstat dem erbern herren, hern Stephan zu den zeiten phfarrer ze Grozze umbe echt und zwainczke phunt phenninge Wienner munizze, der er uns und unser erben gantze und gare gewert hat ze rechten tagen an allen schaden. Und dieselben gulte hat er gechaufet von den viertzke phunt phennigen, die zu dem dritten priester geben sint zu der messe, die Vlreich der Velibrunner ze Grozze gestifte hat. Und desselben guetez hat zu denselben zeiten Seydel der Weizze ein gantze lehen gehabet, do er aufgesezzen ist, do er von dient ein halbe phunt phenninge an sande Michelstage und ein gans und zwae herbstehuerre und ze weinachten zwen und dreizike phenninge fuer vier ches und zwae vaschanchehuerre und ze o^estern zwen und dreizike phenninge fuer vier ches und dreizike air und ze phfyngsten zwen und dreizcke phenninge fuer vier ches. Und ist auch ablait und anlait seczige phenninge von demselben lehen. Und hat sein Niclas Hadmar zu denselben Zeiten ein halbs lehen gehabte ze velde, daz nicht ho^efmarich hat, do er von dient ein halbe phunt phenninge an sande Michelstage und ein vaschanchehuen, und ist auch ablait und anlait dreiczke phenninge von demselben halben lehen. Und hat sein auch Stephan der Tanrat zu denselben zeiten ein halbes lehen gehabt, do er aufgesezzen ist und do er von dient drey schillinge phenninge an sande Michelstage und zu den dryn hoechtzeiten zu ygleicher hoechtzeit ocht phenninge fuer zwen ches und ayn vaschanche huen und ist auch ablait und anlait dreiczke phenninge von demselben halben lehen. Und hat sein Hainreich des Winchler sune ein ho^efstat zu denselben zeiten gehabte, do er auf gesezzen ist und do er von dient vierczke phenninge an sande Michelstage und zu den dryn hoechtzeiten zu ygleicher hoechtzeit zwen und dreizcke phenninge fuer vier ches und ein vaschanchehuen und ist auch ablait und anlait zwainczke phenninge von derselben ho^efstat. Wi^er haben auch dem va^ergenanten herren, hern Stephan dem phfarrer ze Grozze und allen seinen nochcho^emen und dem gotezhaus ze Grozze die va^ergenanten gulte geben mit alle dem rechten und mit alle dem nutzen und wi^er deu in rechter aygens g^ewer herpracht haben unversprochenleich^en versuecht und unversuecht, gestifte und ungestifte, ze velde und ze darffe. swie so daz genant ist. Und schullen seu auch dieselben gulte yn nucz und in g^ewer hynfuer ledichleich^en und vreyleich^en haben verchauffen verseczen geben, wem seu wellent, und allen ir^en fruem domit schaffen an allen ierr^esal, swie iz dem var^e genanten got^ezhaus ze Grozze aller nucz^eleich und aller peste ist. Und da^erczu^e durich gueter sichherhait willen so secze ich egenanter Paul der Siczenda^erffer und ich Margret sein hausvraw^e zu sampte uns und unsern erben mein egenanten Pauln prueder Ott^en und Niclas^en und Pilgreimen die Siczenda^erffer und alle ire erben dem egenanten erbern herren, hern Stephan dem phfarrer ze Grozze und allen sein nochcho^emen und dem got^ezhaus des gueten herren Sande Veyt ze Grozze der ofte genanten gulte datze Gokkenda^erf auf den zwain lehen und auf der ho^efstat zu rechten gewer^en und scherme fuer uns und fuer alle unser erben fuer alleu ansproch, als aygens recht ist und als des landes recht und g^ewonhait ist in O^esterreich. Wer aber, daz der ofte genant herre her Stephan oder sein nochcho^emen und daz got^ezhaus ze Grozze an der va^ergenanten gulte ansproch gewunnen von uns oder von unsern erben oder von wem daz wer, des seu mit recht schaden nemen, denselben schaden, den der egenant herre, her Stephan der phfarrer ze Grozze oder sein nochcho^emen pei ir^en trewn und pei ier^er g^ewizzen gesagen mu^egen, den schullen wi^er yn gantze und gare abtragen und die ansproch auz richten an allen ir^en schaden. Daz lůben wi^er in ze laisten mit unsern trewn an allez gever und schullen seu iz da^erczu haben auf uns egenanten Siczendarffern unverschaidenleich^en und auf allem unserm guet, daz wi^er haben oder hynder uns lazzen in dem lant ze O^esterreich und schullen sein auch dovon becho^emen mit unserm guetleichen willen an allen widerrede, wi^er sein lebentige oder tode. Und daz die rede also stet und unczebrochen beleihe, darüber so geben wi^er egenanten Siczendarffer, wier vier prueder ich Paul und ich Otte und ich Niclas und ich Pilgreim dem va^ergenanten erbern herren, hern Stephan zu den zeiten phfarrer ze Grozze und allen seinen nochcho^emen und dem got^ezhaus des gueten herren sande Veyt datze Grozze den prief zu einer war^en sichtigen urchunde der sachhe versigelten mit unsern anhangunden insigeln. Der sachhe und der rede sint auch zeuge der erber herre, her Poppe von Ebergaezsinge und Vlreich der Velibrunner und Chrystan der Huetstoche mit ir^en anhangunden insigeln an dem gegenwuertigen prief. Der prief ist geben, do man zalt von Chryst^es gepuerde dreutzehen hundert ja^er da^ernach in dem ayn und funftz^ekysten jar des suntag^es an dem palmetage.

Source Fulltext: FUCHS, Göttweig I (=FRA II/51, Wien 1901) S. 455-457