Ich O^etakcher der Ro^erer, Christan und Heinreich mein pru^eder wier derchennen und verichen mit disem prief, daz wier dem gotshaus ze Chotweig gwalt und unrecht getan haben daran, daz wier di zehent, di unser vater saeliger dem got genad von demselben gotshaus ze purchrecht gehabt hat, nach seinem to^ed mer danne sechzehen iar mit gewalt an allen dienst und an herren hant innegehabt und auch ze vrom der hant verwandelt haben, darumb uns der erber herre abt Wulfinch ze Chotweig und sein samenung bechlagt habent ze Wienne in der hofschranne als lang, daz in diselben zehent dertailt wu^erden mit einem rechten von den lantherren und fu^er den versezzen dienst in vro^en pracht heten unsern hof datz Friesing, und was unser herre der hertzog doruber i^er scherm. Daz haben wi^er alz mit pet und mit unsern freunden abgenomen alsverre, daz uns der vorgenant herre von Cho^etweig und sein samenung begnadet habent, und habent uns diselben zehent herwider gelihen ze rechtem purchrecht, als deu unser vater gehabt hat und des purchrechts, des wi^er in versezzen hêten mer danne sechzehen iar all iar funfzehen metzen pon. Des habent si uns lauterlich von besundern gnaden begeben und dorzu^e, wann wier der pon von den zehenten nicht wol bechomen machten, habent si uns di pon abgenomen und waitz dofu^er verschriben also, daz wier hinfuer ewichleich dienen schullen ze rechtem purchrecht von dem zehent auf des Grillenperiger hof¹ vier metzen waitz und von dem zehent auf des Waêchgangshof² funf metzen waitz und von dem zehent datz den Hofen³ neůn metzen waitz, und schol daz lauter und scho^ener waitz sein und schol iaerleich gedient werden vor sand Gyligentag mit einem rechten marchtmezzen chorenmozze dacz Sand Po^elten doselbs in unsern chasten und swo wier des furbaz nicht entaêten, so get wandel dorauf, als auf ander purchrecht in dem land ze o^esterreich und mugen seu uns phenden dorumb auf dem unserm, wo seu wellent, mit unserm guetleichen willen. Waêr aber, daz wier in des mit gwalt vorgiengen untz in daz vierd iar, auf swelihem zehent danne daz vorbeschriben purchrecht als lang versezzen ist, derselb zehent schol dem oftgenanten gotshaus ze Chotweig vervallen sein ledichleich on all widerred und schol in den schirmen, swer herre und gwaltig ist in dem land ze o^esterreich. Und daz in daz stêt und unzebrochen beleib, doruber geben wi^er in disen offen prief versigelten mit unsern anhangunden insigeln. Gegeben nach Christes gepuerd dreuzehen hundert iar darnach in dem ainz und funfzkisten iar an sand Veytstag.

Source Fulltext: FUCHS, Göttweig I (=FRA II/51, Wien 1901) S. 460-461