Vrbanus episcopus, servus servorum dei, dilecto filio . . officiali Pataviensi salutem et apostolicam benedictionem. Sacre religionis, sub qua dilecti filii . . abbas et conventus monasterii Chotwicensis ordinis sancti Benedicti Pataviensis dyocesis devotum et sedulum exhibent domino famulatum, promeretur honestas ac votis illis eorum presertim, que ipsorum et dicti eorum monasterii utilitatem et comodum concernunt, quantum cum deo possumus, favorabiliter annuamus. Exhibita siquidem nobis nuper pro parte eorundem abbatis et conventus peticio continebat, quod prefatum eorum monasterium, in quo triginta duo monachi et plures continue domino famulantur et cui quoddam aliud monasterium monialium eiusdem ordinis, in quo viginti quatuor moniales existunt, ac quoddam hospitale pauperum, in quo tredecim pauperes sustentantur, sunt annexa et subiecta, quibus quidem monialibus et pauperibus ipsi abbas et conventus de fructibus dicti eorum monasterii tenentur cottidie in omnibus necessaria ministrare tam propter copiosam hominum multitudinem ad ipsum monasterium confluentium, quam propter bladi et vini ac aliorum fructuum penuriam, que pluribus annis in partibus illis viguit, necnon propter maximam hospitalitatem, quam idem abbas et conventus hactenus servaverunt et continue eos servare oportet, ac alia diversa et gravia onera ei de die in diem incumbencia adeo est debitorum pergravatum, fructus quosque redditus et proventus dicti eorum monasterii in tantum tenues effecti sunt, quod ipsi huiusmodi hospitalitatem servare et onera eis incumbencia supportare et debita persolvere nequeunt ullo modo et quod nisi per apostolice sedis providenciam celeriter succurratur eisdem, rnonasterium ipsum multum desolari verisimiliter formidatur. Quare pro parte abbatis et conventus predictorum nobis fuit humiliter supplicatum, ut in Nêlib et in Hofsteten¹ ac in Mawtam dicte diocesis parrochiales ecclesias, quarum prefati abbas^a patroni ut asserunt existunt, dicto eorum monasterio incorporare annectere et unire de benignitate apostolica dignaremur. Nos igitur huiusmodi supplicacionibus inclinati discrecioni tue per apostolica scripta mandamus, quatenus predictas ecclesias, quarum centum cum omnibus iuribus et pertinenciis suis prefato monasterio, cuius ducentarum marcarum argenti puri fructus redditus et proventus secundum communem existimacionem valorem annuum ut asseritur non excedunt, auctoritate apostolica perpetuo incorpores unias et annectas ita, quod cedentibus vel decedentibus rectoribus ipsarum ecclesiarum, qui nunc sunt, vel ecclesias ipsas alias comodolibet^b dimittentibus liceat predictis abbati et conventui cor-poralem possessionem ecclesiarum ac iurium et pertinenciarum predictorum libere apprehendere et licite retinere dyocesani loci vel cuiuscunque alterius super hoc licencia minime requisita. Reservatur tamen de fructibus redditibus et proventibus singularum ipsarum ecclesiarum pro singulis perpetuis vicariis secularibus ibidem instituendis et servituris domino laudabiliter in divinis congruis porcionibus, de quibus vicarii ipsi possint congrue sustentari, episcopalia iura solvere et alia eis incumbencia onera supportare non obstantibus, si aliquis super provisionibus sibi faciendis de parrochialibus ecclesiis vel aliis beneficiis in illis partibus speciales vel generales dicte sedis vel legatorum eius literas impetravit, si eciam per eas ad inhibicionem reservacionem et decretum^c vel alias quomodolibet sit processum, quas quidem literas et processus per eas habitos eis quoad assecucionem parrochialium ecclesiarum aut beneficiorum aliorum preiudicium generari et quibuscunque privilegiis indulgenciis et literis apostolicis specialibus et generalibus, quorumcunque tenorum existant, per que presentibus non expressa vel totaliter non inserta effectus impediri earum valeat vel differri quomodolibet et de quibus quorumque totis tenoribus habenda sit in nostris literis mencio specialis. Nos enim ex nunc decernimus irritum et inane, si secus super hiis a quoquam quavis auctoritate scienter vel ignoranter contigerit attemptari. Datum lanue VI. kalendas decembris, pontificatus nostri anno nono.

Source Fulltext: FUCHS, Göttweig I (=FRA II/51, Wien 1901) S. 702-703