Wir Fridreich von gots gnaden unser frawn gotshaus ze Cho^etweyg und wir der gancz convent gemain daselbs vergehen offenbar mit dem prief und tun chund alle den, di nun lebent und hernach chunftik sind, das wir mit veraintem ratt und mit wolbedachtem mu^et zu der zeit, do wi^er es mit recht wol getu^en mo^echten, geschafft und geben haben in unsêr oblay a^echt phunt Wienner phenning gelts gelegen in dem Fo^erst dacz Sand Lienhart und der sew selb Stifter und sto^errer schulten sein. Und derselben a^echt phunt phenning schullen gevallen und geraicht werden alle jar jêrleichen aus der obla^ey newn Schilling phenning zu der mess auf dem letter, das diselb mess dester pas erfolt und erstatt werd, als sey abpt Vlreich sêliger der To^eczenpekch fo^ermallen gestifft hat, und zway phunt phenning schol man raichen und geben aus der vorgenanten obla^ey in di gustêrey, wer di zeit guster ist, und da schol man von ausrichten ein ewigs liecht und daz schol prinnen vor demselben vorgenanten alter têgleichen nacht und tag, und fu^emffczehen schilling phenning schol man auch geben in di gu^estêrey, da schol man di cherczen von ausrichten zu dem grab in der antlaswochen und di schullen dapey prinnen unczt an den o^estertag und di schol man dann darnach pehalten also gancz. Und wann eins herrn apts jartag ist oder sust der herrn ainer stirbt, so schol man dann dieselben cherczen aufczunden pey der par und di übrigen drew phunt phenning schullen gevallen zu des egenanten abpt Vlreichs des To^eczenpechen jartag. Dem schol mon es davon pegen, wann sein jartag ist, des nachtes mit der vigily und des morgens mit den messen und di egenanten cherczen schol man dapey prinnen, u^encz das di mess für sind. Und wann wi^er obgenanter abpt Fridreich abgen und nicht ensein, so schullen uns di obgenanten drew phunt halb gevallen und da schol man uns auch ainen jartag davon begen des nachtes mit der vigily und des margens mit den messen in allen den rechten, als man des vorgenanten abpt Vlreichs des To^eczenpechen jartag peget, als vor geschriben ist. Wer auch, das daran icht versäumt oder verczogen wuerdt, als vor geschriben stet, als offt daz wer, so wêren die herrn vervallen und peliben einem abpt sechczik phenning und di schol man dann geben in das spital den armen lewten. Und darüber geben wir den prief ze ainem waren urchund der obgeschriben sach versigelt mit unser paider anhangunden insigeln. Der prief ist geben nach Christy gebu^erd drewczehen hundert jar darnach in dem syben und achczigistem jar am freytag vor iudica in der farsten.

Source Fulltext: FUCHS, Göttweig I (=FRA II/51, Wien 1901) S. 707-708