Martinus episcopus, servus servorurn dei, dilecto filio . . abbati monasterii Cotwicensis, Pataviensis diocesis, salutem et apostolicam benedictionem. Pia fidelium vota etc. Sane petitio dilecti filii Seyfridi Ryczendorffer, armigeri Pataviensis diocesis, nobis nuper exhibita continebat, quod ipse de sua et parentum ac aliorum amicorum et benefactorum suorum animarum salute recogitans ac cupiens terrena in celestia et transitoria in eterna felici commercio commutare ad dei laudem et gloriam quandam capellam in villa Swellenpach infra limites parrochie parrochialis ecclesie in Spicz dicte diocesis consistentem et ad id ordinarii loci accedente licencia de bonis a deo sibi collatis de novo construi et edificari fecit. Cum autem sicut eadem petitio subiungebat, idem Seyfridus prefatam capellam pro uno perpetuo rectore, qui inibi missas et alia divina officia singulis dominicis ac certis aliis cuiuslibet septimane per eum ad hoc deputandis diebus perpetuis futuris temporibus celebrare necnon etiam eisdem diebus dominicis ante inchoationem misse exorcismum salis et aque et finito evangelio memoriam ad populum pro vivis et defunctis facere debeat, sufficienter dotare, in ea quoque, postquam dotata fuerit, suam sepulturam eligere proponat, pro parte ipsius Seyfridi nobis fuit humiliter supplicatum, ut sibi dictam capellam dotandi licenciam concedere necnon ius patronatus et presentandi rectorem ad ipsam capellam hac prima vice et quociens ipsam deinceps vacare contigerit, per loci ordinarium predictum instituendum sibi ac suis successoribus et heredibus imperpetuum reservare de benignitate apostolica dignaremur. Nos igitur, qui eundem ampliari cultum nostris potissime temporibus intensis desideriis exoptamus supplicationibus inclinati discretioni tue per apostolica scripta mandamus, quatinus si est ita prefato Seyfrido eandem capellam dotandi ut prefertur auctoritate nostra licenciam largiaris et nichilominus, postquam ipse Seyfridus dotem assignaverit eandem, ius patronatus seu presentandi rectorem ad dictam capellam hac prima vice et etiam quocienscunque ipsam vacare contigerit, Seyfrido eiusque successoribus et heredibus antedictis auctoritate predicta^a reserves, prefatoque Seyfrido, ut sepulturam apud dictam capellam eligere ac illius rectori, qui pro tempore fuerit huiusmodi, ut diebus dominicis predictis exorcismum facere necnon vivorum et defunctorum animarum memoriam peragere ut prefertur libere et licite valeant, indulgeas auctoritate memorata iure tamen dicte parrochialis ecclesie et alterius cuiuslibet in omnibus semper salvo. Datum Florencie VIII. idus marcii pontificatus nostri anno tercio.

Source Fulltext: FUCHS, Göttweig II (=FRA II/52, Wien 1901) S. 178-179