Martinus episcopus, servus servorum dei, venerabili fratri . . episcopo Electensi et dilectis filiis . . sancti Lamperti de Sancto Lamperto ac Scotorum in Wienna Salzeburgensis et Pataviensis diocesis monasteriorum abbatibus salutem et apostolicam benedictionem. Vite ac morum honestas aliaque laudabilia probitatis et virtutum merita, super quibus apud nos dilectus filius Caspar Chalskoph, clericus Pataviensis diocesis, fidedigno commendatur testimonio, nos inducunt, ut sibi reddamur ad graciam liberales. Exhibita siquidem nobis nuper pro parte dicti Casparis peticio continebat, quod olim parrochiali ecclesia sancti Jacobi in Kunigstetin dicte diocesis, quam quondam Albertus ultimus ipsius ecclesie rector, dum viveret, obtinebat, per eiusdem Alberti obitum, qui extra Romanam curiam diein clausit extremum, vacante idem Caspar vigore quarundem aliarum litterarum nostrarum, per quas dudum sibi de beneficio ecclesiastico cum cura vel sine cura ad collacionem provisionem presentacionem seu quanvis aliam diposicionem venerabilis fratris nostri . . episcopi Pataviensis et dilectorum filiorum . . prepositi . ., decani . ., scolastici . ., cantoris . ., thesaurarii . ., custodis et capituli singulorumque canonicorum et personarum ecclesie Pataviensis communiter vel divisim pertinente, vacante vel vacaturo graciose provideri mandavimus, eandem parrochialem ecclesiam sic vacantem et ad collacionem eiusdem episcopi duntaxat pertinentem infra tempus legitimum acceptavit et de illa sibi obtinuit provideri. Cum autem sicut eadem peticio subiungebat, idem Caspar dubitet acceptacionem et provisionem predictas ex certis causis iuribus non subsistere et sicut accepimus, dicta parrochialis ecclesia adhuc ut prefertur vacare noscatur, nos volentes eidem Caspari premissorum meritorum suorum intuitu graciam facere specialem discrecioni vestre per apotolica scripta mandamus, quatinus vos vel duo aut unus vestrum per vos vel alium seu alios parrochialem ecclesiam predictam, cuius fructus redditus et proventus sex marcharum argenti secundum communem extimacionem valorem annuum ut idem Caspar asserit non excedunt, sive ut prefertur sive alias quovis modo aut ex alterius cuiuscumque persona sed per liberam resignacionem alterius per eum de illa extra dictam curiam nostram coram notario publico et testibus sponte factam vacet, eciamsi tanto tempore vacaverit, quod eius collacio iuxta Lateranensis statuta concilii ad sedem apostolicam legitime devoluta vel ipsa parrochialis ecclesia disposicioni apostolice specialiter reservata existat et super ea inter aliquos lis, cuius statum presentibus haberi volumus pro expresso, pendeat indecisa, dummodo tempore dationis presencium non sit in ea alicui specialiter ius quesitum, cum omnibus iuribus et pertinentiis suis eidem Caspari auctoritate nostra conferre et assignare curetis inducentes eum vel procuratorem suum eius nomine in corporalem possessionem parrochialis ecclesie iuriumque et pertinenciarum predictorum et defendentes inductum amoto exinde quolibet illicito detentore ac facientes sibi de ipsius parrochialis ecclesie fructibus redditibus proventibus iuribus et obvencionibus universis integre responderi contradictores auctoritate nostra appellacione postposita compescendo, non obstantibus felicis recordacionis Bonifacii pape VIII predecessoris nostri et aliis constitucionibus apostolicis contrariis quibuscunque aut si aliqui super provisionibus sibi faciendis de huiusmodi vel aliis beneficiis ecclesiasticis in illis partibus speciales vel generales dicte sedis vel legatorum eius litteras impetrarint, eciamsi per eas ad inhibicionem reservacionem et decretum vel alias quomodolibet sit processum, quibus omnibus eundem Casparem in assecucione^a dicte parrochialis ecclesie volumus anteferri, sed nullum per hoc eis quoad assecucionem beneficiorum aliorum preiudicium generari seu si episcopo Pataviensi pro tempore existenti vel quibusvis aliis communiter vel divisim a dicta sit sede indultum, quod ad recepcionem vel provisionem alicuius minime teneantur et ad id compelli aut quod interdici suspendi vel excommunicari non possint quodque de huiusmodi vel aliis beneficiis ecclesiasticis ad eorum collacionem provisionem presentacionem seu quanvis aliam disposicionem coniunctim vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mencionem et qualibet alia dicte sedis indulgencia generali vel speciali, cuiuscunque tenoris existat, per quam presentibus non expressam vel totaliter non insertam effectus huiusmodi graciam impediri valeat quomodolibet vel differri et de qua cuiusque toto tenore habenda sit in nostris litteris mencio specialis. Volumus autem, quod quam primum dictus Caspar vigore presencium parrochialem ecclesiam predictam fuerit pacifice assecutus, prefate littere et processus habiti per easdem et quecunque inde secuta extunc sint [inania]^b et irrita nulliusque roboris vel momenti. Nos enim ex nunc irritum decernimus et inane, si secus super hiis a quoquam quavis auctoritate scienter vel ignoranter contigerit attemptari. Datum Rome apud sanctos apostolos VIII. kalendas iunii, pontificatus nostri anno septimo.

Source Fulltext: FUCHS, Göttweig II (=FRA II/52, Wien 1901) S. 191-193