Wir Lasslaw etc. bekennen und tun kůnd offenlich mit dem brief, daz wir angesehen haben die gnad, die den erbern, geistlichen, unsern lieben andêchtigen . . dem abbt und convent zum Kottweig von kunig Albrechten von Rom und anndern unsern vordern fursten von O^esterreich von des vogthabern wegen, des sy uns jêrlich zu vogtrecht phlichtig sind ze raichen, gegeben sind, derselben unser vordern brief und hantvest sy uns auch daru^emb getzaigt habent, die in weilent unser lieber herr und vater kunig Albrecht, Ro^emischer, zu Hungern, zu Beheim etc. kunig, den allen got gnedig sey, mit seim brief bestêtt hat, das wir durch des obgenanten abbts fleizziger pete, und daz wir seiner und seiner conventbru^eder guten werich und gepets tailhafftig werden, und von sundern gnaden in dieselben ir gnadbrief und hantvest in aller der weis, als in die von den obgenanten unsern vordern und vater gegeben und bestêtt sind, von furstlicher macht als herr und lanndesfu^erst in O^esterreich von newen dingen bestêttigt und bekrefftigt haben, vernewen bestêtten und krefftigen in die auch wissentlich in krafft des briefs, mainen und wellen, daz es hinfur genntzlich dabey beleibe ungeverlich. Auch tůn wir in die gnad, wenn das ist, daz in ir vo^egte, so sy auf allen iren gutern, die in unserm lannd gelegen sind, gegenwurttiglich habent oder kunfftiglich gewinnent, zu swêr sein wolten oder in sust unfuglich wêrn, daz sy dann gewalt haben, dieselben ir vogt zů verkern und nach unserm rat und mit unser wissen ander vo^egt an derselben stat ze nemen, als offt in des not beschicht, als in weilent die obgenanten unser vorfarn und vater solich gnad vormalen mit iren briefen auch getan habent, mit urkunt des briefs besigilten mit unserm kunigklichen anhangundem insigil, das wir in unserm furstentům O^esterreich gebrauchen. Geben zu Wienn an mittichen vor dem heiligen auffarttag nach Kristi gepurde im vierczehenhundert und funf und funfczigisten jar, unser reich des Hungrischen etc. im funfczehenten und des Behemîschen im anndern jaren.

Source Fulltext: FUCHS, Göttweig II (=FRA II/52, Wien 1901) S. 461-462