Nos Sigismundus dei et apostolice sedis gracia episcopus Salumensis,^a cooperator in spiritualibus reverendissimi in Christo patris et domini, domini Vdalrici eiusdem gracia Pataviensis episcopi, universis etc. Quia pro modulo etc. Igitur de consensu et voluntate specialique singulari commissione prefati reverendissimi in Christo patris et domini Vdalrici episcopi Pataviensis domini nostri graciosi gracia spiritus sancti nobis specialiter suffragante ea diligencia et devotione qua potuimus de novo consecravimus domino altaria in corpore monasterii Gotwicensis, unum versus aquilonem in honore sancti Michaelis archangeli et omnium angelorum, secundum versus meridiem in honore sancte Erndrudis virginis vicesima die mensis octobris. Item vicesima quarta die prefati mensis, que fuit proxima dominica ante sanctorum Crispini et Crispiniani martyrum, chorum prefati monasterii de novo consecravimus cum suo principali altari in honore sancte et individue trinitatis et sancte crucis specialiter tamen in honore gloriosissime dei genitricis virginis Marie assumpcionis assistentibus nobis in pontificalibus reverendis et venerabilibus patribus et dominis. domino Wolfgango antedicti monasterii, domino Petro ad Sanctum Petrum Saltzeburge et domino Thome in Lambaco, abbatibus ordinis sancti Benedicti, necnon domino Pernhardo in Berichtolsgadem et domino Chunrado ad Sanctum Andream supra Draissam, prepositis ordinis sancti Augustini canonicorum regularium Saltzeburgensis et Pataviensis diocesis, dedicacionem vero prefati chori et altarium ac tocius monasterii ad instanciam et peticionem reverendi patris domini Wolfgangi dicti monasterii abbatis ac tocius conventus ibidem ex matura deliberacione statuimus proxima feria tercia post festum penthecostes a cunctis Christi fidelibus perpetue celebrari et devote venerari. Igitur omnibus vere penitentibus contritis et confessis, qui ad predictum chorum sew monasterium et altarium convenerint missasque ibi legerint sive audierint seu manus adiutrices porrexerint cum cera candelis libris quibusve aliis rebus ad cultum divinum spectantibus, si qua devote obtulerint, quocienscumque hec fecerint sive ibidem tria: pater noster, et tria: ave Maria, et unum: simbolum apostolorum, flexis genibus devote oraverint, de omnipotentis dei misericordia et beatorum Petri et Pauli apostolorum eorum auctoritatibus confisi semper quadraginta dies criminalium et octuaginta venialium de iniunctis sibi penitentiis misericorditer in domino relaxamus. Datum et actum loco et temporibus quibus supra sub anno domini millesimo quadringentesimo quinquagesimo sexto harum testimonio litterarum sub appensione nostri sigilli roboratarum.

Source Fulltext: FUCHS, Göttweig II (=FRA II/52, Wien 1901) S. 473-474