Vdalricus dei et apostolice sedis gracia episcopus Pataviensis honorabili devoto in Christo sincere dilecto Martino electo monasterii beate Marie virginis in Gotwico ordinis sancti Benedicti nostrarum fundationis et diocesis salutem in domino. Cum pridem monasterium iam dictum per liberam resignationem¹ devoti in Christo dilecti fratris Wolfgangi, ultimi et inmediati eiusdem monasterii abbatis, pastorali fuisset solatio destitutum, religiosi in Christo dilecti Thomas prior, Laurencius senior, Wolfgangus celerarius totusque conventus iam dicti monasterii rationabiliter advertentes, quam periculosa vacacio diutina monasteriis existere soleat viduatis ex eaque in spiritualibus et temporalibus teste experientia, que rerum cunctarum efficax est magistra, gravia dispendia patiantur, considerantes eciam in eleccionibus per viam scrutinii faciendis sepius discordias et rancores inter electores suboriri in nos tamquam arbitrum et bonum virum super futuro abbate preficiendo et eligendo unanimi voto compromiserunt plenam dantes nobis potestatem abbatem eidem monasterio eligendi, prout in quodam compromissi instrumento desuper confecto plenius continetur. Qua potestate et auctoritate nos utentes matura et diligenti deliberatione cum pluribus religiosis et devotis viris prehabita te eiusdem monasterii professum, ut hoc eciam clarius et feriatim in quodam publico instrumento continetur, tandem in abbatem eligimus, quam quidem electionem conventui dicti monasterii solempniter presentatam conventus ipse et singuli approbantes eidem de suis manibus propriis subscripserunt devoteque supplicarunt tibi desuper munus confirmacionis et consecracionis graciose impartiri, quemadmodum decretum per eos nobis oblatum clarius comprehendit. Sane ex iniuncti nobis pastoralis officii sollicitudine dicti monasterii incomodis et dispendiis provide consulere volentes crida seu proclamacione solempni in locis debitis et solitis premissa tam eleccionis vires quam tuam personam, prout de iure debuimus, examinavimus diligentur. Tandem post debitam singulorum inquisicionem et examen eleccionem ipsam iuxta iuris communis disposicionem canonicam reperimus, quam exinde, quantum valemus et possumus, approbamus et in dei nomine confirmamus personamque tuam tum religiositate vite tum litterarum sciencia etatis maturitate morum gravitate et sancti Benedicti regula competenter invenimus instructam plurimumque commendatam. Idcirco quia in terinino peremptorio ad hoc per nos prefixo nullus coram nobis, qui pro suo interesse aut alias contra huiusmodi eleccionis vires aut personam tuam aliquid opponere vel contradicere vellet, comparuisset, de tua industria legalitate et ydoneitate plurimum ut premittitur confidentes te regimini et abbatie monasterii prefati ex nostre auctoritatis ordinarie plenitudine certa denique sciencia duximus preficiendum teque in prelatum et abbatem sepedicti monasterii Gottwicensis eadem auctoritate approbamus et confirmamus² per presentes investientes te per annuli traditionem, ut moris est, de eadem in nomine patris et filii et spiritus sancti curam animarum regimen ac spiritualium et temporalium administrationem eiusdem prelature et monasterii tibi plenarie committentes harum, quibus nostrum sigillum appensum est, testimonio litterarum. Datum et actum Wienne in curia nostra episcopali ac cappella beate Marie virginis annexa sexta decima die mensis martii anno domini millesimo quadringentesimo quinquagesimo septimo.

Source Fulltext: FUCHS, Göttweig II (=FRA II/52, Wien 1901) S. 479-480