Unser gebet etc. Als ir uns am jungsten ain schreiben zuegeschiecht habt etliche swere wort inhalttund, haben wir vernumen, dabei auch uns schreibt, wie wir euch an ewren sold viertzehen phund phenning schuldig solten sein etc. Nwn ist euch wissenleich, das ewer sold in gelt pringt XXVIII lb. d. So pringt dŷ sum ewrs gelichens und ausgebns gelt nach laut ewr raittzedl XI lb. LXXXII d., das alles in sum pringt XXXVIIII lb. LXXXII d. und nicht mer. Darauf sein wir underricht durch unsers kelner register, das ir in gelt von im enpfangen habt XXXIIII lb. LXXX d., als wir euch dann ain zettel hiemit schikchen, darin ir chlêrlich underricht werdet. Auch ist uns anpracht warden, wie ir in dem anslag der X Vngrischen gulden, dŷ ir unseren armenlewtten geliehen habt, daran ir dan enphangen habt XVII lb. III ß. d., an dem uns dan dŷ u^ebermasz der X gulden auch zuestend. Dan was ir ubermasz traÿdt oder habern enphangen hiett, stuend uns auch von euch aus. Dann von wegen zwair pu^echsen und ander vordrung wegen haben wir uns mit euch in ewrem abschaiden guttiklich veraint und ir uns des pegeben habt und hoffen und getrawen, ir wellet es beÿ solichen obberuertten herkomen und besliessung genczlich westen lassen. Dan von wegen des getraidtz, so ir zw Sandt Po^elten auf unser guet getrawn genomen habt, als wir an ewren schreÿben vernu^emen haben, lassen wir ew wissen, das wir euch in kainem aigem noch gever sunder treulich euch zuegeschriben haben, und lassen es bey ewren schreiben westen und getrauen, ir nemet ew darumb kainen u^enmett. Vermainet ir uns aber daruber icht spru^ech ze vertragen, so wellen wir euch vor unsers genadigen herren dem Romischen kaysser oder seiner kaisserlichen genaden rete gern ains fuerkomens und verhor seyn als vor unser herr lanczfurst und des gotczhaus vogt. Als ir uns iecz aber schreibt, wie wir ew am raitczedel zuegeschikcht haben, darin vermainet, wie ir V lb. und III lb. von uns noch den unseren nicht emphangen habt, auf solich haben wir uns in den registern erkundt, das ir dŷ V lb. d. in abessenhait unsers kelners von her Larenczen enphangen habt und dŷ III lb. hat euch unsers^a kelner beÿ dem Leonhartt kuchenmaÿsster in ewer zymer geschikcht. Aber als ir schreibt, bie wir unpiliche zicht euch tan mit schreiben und mundleich under dŷ leÿt ausgeben solten haben mit etlichen sweren hertten warten, dew uns nicht puerren zu [583] verantbuertten, wie ir an unsserem jungisten schreiben habt vernumen, lassen wir es noch dabey besten, wenn ir selbs in ewrem schreiben bekendt, das ir traid und habern habt enphangen genomen und geraicht an dŷ endt, als ir dan an ewrem schreiben bestundt, daran wir kain misvallen sunder ain guet gevallen haben und ob ir etbevil getrait hiet enphangen, wir wolten uns darumb nicht entzwaid, sunder freuntlich mit einander gericht haben nach solichem vertrawn und frontlicher abschied, als zwischen uns beschechen ist, und sa^echen von herczen nichcz lieber, den das wir in guettem willen und frontschaft weliben und uns vertruegt, das ir uns pillich vertragen solt. Ob sich aber in raittung erfund, daz wir euch schuldig wurden, dez wir nicht sein underricht, wellen wir euch gern und willichleich entrichten. Hoffen, ier lasset ez pey solchen unsern freuntleichen erpieten; vermainet ier aber soleich unser erpieten icht aufzenemen, sein wir willig vor unser allergenedigisten herrn, dem kaisser ayns furkomens seyn, verhor und rechtens sein, als ier euch des auch in eurem schreiben habt erpoten und verwilligt habt.^b

Source Fulltext: FUCHS, Göttweig II (=FRA II/52, Wien 1901) S. 581-583