Wir Fridreich etc. den erwirdigen, ersamen geystlichen unserm lieben andachtigen N. allen und yedemlichen prela^eten unsers furstentumbs zu Osterreich etc. Als pey meniger gehalten landtegen und am ju^engsten zw Kornnewnburg von der swerren krieg und geprechen wegen umb den selben unserm fu^erstentumb O^esterreich und landern und lew^etten obligende in ain gemaine lanndtstewr ye von zwainzig pfundt pfenning wirt ains zw geben viergenumen und verbilligt ist, darin ir euch auch geben habt, damit solch obligund geprechen aufgehebt und landt und lew^et widerumb in ir rechts wesen und frid und rue und gemach geseczt mugen werden, darzu dem^a drey tag mit nam sand Michelstag sand Merttentag und die weynnachten nachstzwkunftig zw inbringen derselben stewr und yedem derselbig tag der drittail zw geben und inzwnemen genenendt sein und aber derselb sand Michelstag dar^b zw na^ehendt und die zeyt zw kurcz ist, enpfelch mir^a euch allen und yedem besunder ernstlich und wellen, das ir solich stewr in massen, und die pey dem weruerten landttag viergenumen ist, und^c eur leudt und hindergesessen slachen, die zwsampringen und dem edln, lieben getrewn Jorigen von Volchkelsdorff, unserm rat, dem wir zw innemen der stewr, was der von den, so in unser chainer^d gehêvr gevallen wierdet, geerdet haben zw den ta^egen na^emlich den ersten zw sand Merttentag, den andern auf weinachten, den dritten zw unser lieben frawn tag zw liechtmessen nagst kunftig an lenger vercziehen [der]^e antwurt, damit man dye zw hindan den richtumb der obruechten nottdurfft geprauchen und landt und lêut in frid und gmach seczen mu^egen und darin in nicht anders tuet. Wan welleich darin verziehen die wurden darumb als die ungehorsamen fu^ergeno^emen und gestrafft. Darin tuet ir unser ernstliche maynung. Geben zw der Newnstat am pfincztag vor sand Michelstag anno domini etc. LXIIII, unser chaysertumbs im vierzehenden jar.

Source Fulltext: FUCHS, Göttweig II (=FRA II/52, Wien 1901) S. 610-611