Hern Steffan Eytzinger von Eytzingen. Wolgeborner edel etc.! Alls Hainreich Pfierter¹ und ander ytzo geliger und besasz uns an seitten zu Mautarn gemacht, davon unsern armenlewten daselbs um gesessen irer varunden guetter und speisz etwevil genomen haben und noch tagleich nemen, bitten wir ew in besunderm andachtigen vleis, ir wellet dem benanten Pfierter und den sein schreyben, das sy dy unsern verrer nemens irer gutter vertragen und die an irem leib und guettern gancz unangelangt lassen, darczu an schaden halten. Wurden sy aber daruber uns und den unsern icht weyter mit nemen irer gueter oder in andern wegen zu schaden handeln, uns alsdann darauf wider dy selben hilf und beistand tuet, damit wir irer beschedigung vertragen beleiben. Ewr verschribner antwurt last uns bey dem poten wissen, etc. Geben zu Gott(weig) an erichtag nach sand Erharcztag anno LXIIII. Mert von gottes genaaden abbt zu Gott(weig).

Source Fulltext: FUCHS, Göttweig II (=FRA II/52, Wien 1901) S. 559