Hŷe an dem gegenwurtigen brief sind vermerckt und geschriben die rechten der rechten herrschafft unnser fraun gotzhaws ze Gothweÿ und ir holden gesessen ze Napperstarf:||
Item von ersten so meldent sew in dem panteyding alles, das sew^e sagen oder reden, das sprechent sew peÿ irrn trewen und peÿ dem aÿd, den sew dem gotzhaws geschwaren habennt.||
Item sew meldent auch das, das ir eegenantte herschafft ze Gotweÿg oder ir anwalldt all jar hŷe an pamtayding schullen haben in der wochen vor sanndt Nicklostag oder in der||
wochen darnach unnd schullen sew^e hŷe peÿ in ein nachtwo^ell haben unnd ain nachtsidl sein dritter oder sein vierder mit aÿnem schreÿber und was dŷe zerung pringt, das scho^ellen dŷe von Hetzmansdorff die von Hord und dŷe gemain hye ze Napperstarff under einander anschlahen unnd pezallen und ain pu^eriger, die der gemaÿn gefellt, der schol das ŷnnemen und ausgeben trewlich.||
Item es scholl auch ŷdes pantaÿding haben sein nachtaÿding unnd dasselb nachtaÿding soll pesytzen ir amptman und dŷe geschwaren zw Napperstarff und schullen es than trewlich, alls es in vor der herrschafft ze Chotweÿ entpholhen ist.||
Item das darff Napperstarff ist aufgefangen mit dem kreftigisten rechten, alls unnser frawn gotzhaw^es von Chotweÿ niderhalb der Thu^eenaw^e hat.||
Item sew meldent unnd ru^eegent mer, das das darff scholl umbfangen sein mit eÿnem graben unnd aussen auf dem graben scholl gen ein geesteÿg, da zwen nebn einander wol mu^egen geen. Wer das nit hŷelt, der wer umb zwelif pfenning ze wandln und wer ein stigl hat uber den grabn, der scholl dye pebaren unnd scholl haben an der nachpawren schaden unnd gŷeng icht schadn darausso scholt er aber abtragn den schadn und gebn dem richter zwelif pfenning ze wandl unnd dasselb darff scholl habn drew valthar, dŷ schulin peru^eebt sein, das ir viech peruebt mu^eg aushyngen. Das ain valthar gegn Mêlperg schol habn ein gemaine viechtrifft auf ir waÿd yn und au^eszwtreybn an der nachpaw^ern schadn. Unnd wan die amptman unnd dŷ geschwaren sagn ŷn weg und ŷn steg und ŷn dŷe viech trifft, wer sich daruber setzt, der ist umb XII d. zw wandln und scholl gebn das tagwergkh ŷn dŷe gemaÿn.||
Item das darff scholl habn drey pru^egkh und dŷselbigen prugkh schullen pewarn dŷe gemaÿn. Wan der amptman sagt, so scholl ein y^edlicher darzw^ee hellfn. Wer des nit thet, der wer dem richter XII d. ze wandl und der gemaÿn das tagwergkh.||
Item das darff scholl habn ein wasserflu^es, der peru^ebt seÿ ins darff unnd au^esm darff, wen ein wasser cho^em, das mu^eg fliessn der gemain an schaden.||
Item wer den engeet mit schwel oder mit wê das wa^er, der ist umb XII d. ze wandln, und wer den wasserflu^essn mit ho^err wolt engen, der scholl^a das thu^een ein gebantten von dem darff. Wer des nit thet, der wer umb XII d. zu wandl und das darff das scholl sein, das ain nachpawer den anderen schol au^esfridn. Wer das nicht thet, der sein nachpawren ŷnner haw^es au^essfridet unnd klagt er dem amptman, das das dŷ vier peschaw^eent, so trag er sein nachpawren den schadn ab und geb dem ambtman XII d. ze wandl, wer das ŷnner haw^es oder au^esser haw^es. Und dŷ nachpaw^eren ru^eegent mer, es scholl aÿner haben ein wasserru^ensen^b an schaden.||
Item sew meldent mer, wer machet ain schla^eter grueb oder ein hauffn, das dŷ nachpaw^ern schadn davon nemen, so tru^eeg aÿm seim schadn ab und geb dem richter das wandl, stu^eentz ott uber den dritten tag.||
Item sŷ meldent mer, wer pehŷeldt fremdt leÿdt uber den dritten tag ans richter willn unnd nem yempt schadn, dovon so scholl er den schadn abtragen und dem richter XII d. ze wa^endl.||
Item sŷ meldent mer, das ein ÿedlicher pachpaw^er scholl au^ezfridn, es seÿ ze veld oder ze dorff, sein nachpaw^ern. Wer das nicht thet, der tru^eeg sein nachpawrn den schadn und dem richter XII d. ze wandl.||
Item sew meldent auch mer, das der richter scholl pietten vierzehen tag vor sand Jorgntag, das ein ÿedlicher man zw veld und zw darff scholl au^essfridn ob er sein nit thet, das das der richter und dŷe vierer peschaw^eeten, so wer er umb XII d. zw wandln, als offt man uber ŷn klaget.||
Item sew meldent mer das: als widerzems oss das scholl [man] pringen an gewonlich stet es seÿ chue schof oder saw^e oder anders unnems ozs, das scholl man fu^eeren in dŷ laemgru^eeb oder stetten niderhalb des darff.||
Item sew meldent mer, wan aÿner sein agker will su^eechn, der scholl das thuen vierzehn tag vor sand Jorgntag und vierzehn tag hŷnnach. Wolt er aber lenger peÿtten und wolt sein nachpaw^ern schadn thu^een, so sprech wir das zw recht, das er dŷe frucht das jar nicht ferrer su^eechn scholt.||
Item sew meldent mer, wan ayner ain agkher agkhert, so scholl er'n rechtleich agkern. Thet er des nit, so ist ze wandl umb zwen unnd sibntzig d.||
Item sew meldent mer, wan aÿner sein schniter au^essweÿst, so scholl ers weysn an der nachpaw^ern schaden. Thet ers aber nicht, als offt er ein schniter mit ŷm weÿsset, als offt wer er umb XII ze wandeln.||
Item sew meldent mer, wan aÿner ein jeuchart agkher hŷnliess zw schneÿdn, schol der schniter nemen ein garb in dem jan angefa^erleÿch.||
Item sew meldent mer, das ain yegleicher, der scho^ebern oder schneÿdn well, der schol das thuen peÿ tag, wan ain nachpaw^er den andern wol gesehen mag. Thet er aber des nicht und plib lenger daust, so scholl man in anfarn fur ein schedliechn man.||
Item sŷ meldent mer, wan aÿner fuetern woll, wan das traÿd zeÿttig wirdt, so schol ers pintten entzwisch. Wan er sein nicht thet, so scholl der richter auf dy gassn ru^etten dŷ garib unnd dem richter XII d. ze wandl.||
Item sew meldent, wan man in fu^ern will, so scholl der richter der gemain ze einander rueffen und scholln wern uberain. Wans der gemain gefelldt, so schol der richter ayn tag verfarn.||
Item sew meldent mer, das der halter unnd der hu^eeter scholl habn ein messl, das gerecht seÿ. Das scholl er abhemen vor richter unnd pu^erigern unnd ob er nicht ein gerechte inass hŷet, so wer er umb XII d. ze wandln, als offt mans widerfarn wurdt.||
Item sew meldent mer, das der huetter scholl helffn dem halter in der viechtrift ŷn und aus all mal unnd wan das viech in das darf ku^embt, so schol der hu^eeter dŷe gemain pebarn, wo des not ist. Ob er des nit thet, so hat die gemain abzesetzn vierzehntag vor dem eden unnd ob nicht aÿnem schad gesehech, so scholl der hu^eeter aufzaign dem richter. Thet er des nicht, so tru^eeg der hu^eetter aÿnem sein schadn ab.||
Item sew^e meldent mer, wer ein pflu^eegh hab, der scholl gebn dem schmidt ein gestrichen metzen waÿtz, agkher vill oder wenig.||
Item sŷ meldent mer, das man ŷm dŷe weinmass schol gebn dŷe gerechtn achtring herraus und wer des nicht thet, wan man ŷn anguss, das das weÿsleich wer, der wer umb XII d. ze wandl, als offt man ŷm anguss.||
Item sew^e meldent mer, das ein flesichker nicht scholl engen auf dem perg, wen ein ÿegleicher flesichker schol sein fleisch hagken hinaus auf dem perg, es sein gest oder dŷe hieingen. Wers den gesten wolt wern und wolt sŷ darumb anveinttn, der wer umb zwen und sechs schilling.||
Item sew meldent mer, der sŷ hŷe woldt iern, wellicher handwergkher er wer, wer^c der wer umb II und VI schiling d.||
Item sew meldent mer, das der Chirigperg¹ schol frey sein. Wer daran zugket oder der leÿt wolt umbtreibn, der ist umb zwen unnd sechs schilling ze wandln.||
Item sew meldent mer, wen dŷ kirichgrabn schu^elln ein ŷedn verpotn sein mit grasn oder mit halten und der grabn scholl dem hueter entpholhn sein als waÿtz und habern. Der des nicht wolt achtn, der geb dem richter XII d. ze wandl.||
Item sew meldent mer auch, als weÿt und alsver ir huedt get und was man darauf verwandelt, dieselbigen wandl sind alle irs hrrn^d von Chotwey den aussgenomen, was der todt weru^eerdt.||
Item sew^e meldent mer, ob ein schedleÿcher man pegriffn wu^erdt in dem darff, so scholl der richter enpieten dem gericht gen Laa und schol den schedlichn man pehaltn untz an den dritten tag. So scholl das gericht von Laa cho^emen nicht in das darff, wan der darffrichter scholl den schedlichn man hŷnaussgeantwu^ertn auf das gemerek und scholl dem gericht von Laa dreÿ stund ru^eeffn. Ku^empt er nicht, so ist das ir recht, das der richter den schedlichn man scholl anpinttn mit aim ru^eedhalbem. Reÿst er sich ab, so ist dŷe gemain und der richter unengoltn, das ist ir rêcht.||
Item so ein dŷep kem in unsern hof und rueft er sein nachpaw^ern, das er ŷm ze hilf ko^em, kumpt er ŷm nit zw hilf, so meld wir ŷn fu^er ein schedlich man, und uberwu^endt er den dyep und schlug in ze todt, so scholl er yn nemen peÿ den hendtn oder peÿ dem harr unnd schol ŷn zŷehn auf dŷ gassn und schol ain pfenning auf ŷn legn, so hat er in gepu^eest gegn der wellt unnd gegn dem gericht. Und ob ein chutzldiep ko^em ŷn ains nachpau^ern haws und stull ŷm, was under zwelf pfenning wer, es wer fraw^e oder man unnd wurd er pegriffn, so scholl man es du^erchschlahn und nem sein gu^eet wider und lass es lauffn, darum ist er nŷem pflichtig.||
Item so ein pru^enst au^esskho^em und rueft aÿner den nachpawern und welicher nit zweleu^ef und ob er es verla^eg, so wer er des verfalln von yeden hŷndersessn XII d. ze wandl. Item ob zwen feindtschafft an ein andern hŷettn und griff aÿner den andern an, dŷ weÿl die pru^enst wer, so scholl er habn frid vom haw^es zw^em haw^es, so wer er verfalln zwen und sechs schilling ze wandl. Es mag auch aÿner ain angreÿffn in der moss. er seÿ leyb und guet verfalln. Und ob das wer, das zwen an eynander rau^eftn, so wern sŷ von ÿedn finger 1 lb. d. verfalln. Und ob zwen an eÿnander schlugn mit den hendtn, schlu^eeg aÿner den andern mit flacher handt, so wer er umb V lb. d., schlecht er in oder mit der fau^est und hŷet den daw^em in der faw^est, ob das peberlich wer, so wer er verfalln ain lb. d.||
Item sew meldent mer, wan aÿner ain wu^erff, mit we das wer, so wer er verfalln umb 5 lb. ze wandl.||
Item wan ayner aim fu^erwarttet oder gŷeng mit eÿnem gladn armst ingever, so sag wir ze wandl um zwen unnd sechs schilling, schew^est er ab ingever, so ist er verfallen funf pfu^endt. Item sew meldent mer, wan aÿner ain anleuf mit aÿm spies, so ist ze wandln umb zwen und sechs schilling.||
Item sew meldent mer, wer der wer, der ein schwert oder ain messer uber an zugket, als oft er das thet, so ist er umb XII d., schlu^eeg er in aber mit palig mit al, so wer umb zwen unnd sibntzig, schlu^eeg er in aber ein fliezsend wu^enden, so wer umb zwen unnd sechs schilling.||
Item sew meldent mer, wan aÿner dem anderen ein fru^echtpa^ering paum abhagkhet, ob man das uberfarn wu^erdt, so ist er ze wandln umb fu^enf pfundt.||
Item sew meldent mer, chnappen und gens mu^egn sich hŷe nit dernern und schu^elln hŷe verpotn sein. Ob si dŷe gens pegriffn, so scholl ers ze todt schlahn und schol nŷmandt nichts pflichtig darumb sein.||
Item sew meldent mer, das ein amptman hŷe durch aÿns yeglichn willn scholl raÿsn, was er pey der su^en peraichn mag au^ef sein aÿgnew^e zeru^eng.||
Item si meldent mer, das aÿn amptman scholl habn ein unverdiencz lehn.||
Item sew meldent mer, wer richter oder pu^erger widertreib, der ist umb zwen und sibntzig ze wandln.||
Item sew^e meldent mer welche dew^e weren, dye unfu^eer treiben in dem darff und welcher das sech und das nit anpra^echt an den amptman und was derselbig selh, der das verschwig, der schollt verpu^eessn, wer er hallt sein průeder.||
Item sew^e meldent mer, wer verpottene wardt aussgeb vor richter unnd vor pu^ergern aÿner dem andern, der ist umb zwen unnd sibntzig pfenning ze wandl.||
Item sew^e meldent mer, wan der richter nach der gemain sendt unnd welcher ein hagkn zw^em richter tregt, die ist umb XII d. ze wandln.||
Item sew^e meldent mer, welcher der wer, der aÿnem sein arbaiter auffredet in ein ander darff aÿm zw dŷenst und dem hŷeingen ze schadn, wo man das uberfu^eer, der wer umb XII d. ze wandln, als offt er es thet.||
Item sew^e meldent mer, wan aÿner dingt knecht und dŷeren, so scholl er ŷm trewlich dŷen und scholl sein trewn genueg thu^een, so schol derselbig man sein knecht trewlich mitfarn und gŷeng ein knecht oder ain dŷeren aus dem dŷenst an ursach unnd hiet nu^er vierzehen tag untz au^ef jar, so ist im der herr nichts pflichtig ze geben. Geb ym aber der urlaa an ursach, so scholt der knecht gen zw^e eim wein und schollt zern untz an den drittn tag unnd dŷeselbig zerung scholl der pawr zaln und schol der paw^er dem knecht seÿn lan geben.||
Item sew^e meldent mer, wan ain pawern knecht peÿ eÿm leÿtgeben zer, so schol der leitgeb den knecht pfentn erberlich, das er seÿm hrrn^d seÿn arbait mu^eg aw^essrichtn. Ob der leÿtgeb den knecht als vast enplo^eset, so schol der leÿtgeb dem pawern sein arbaÿt selbs au^esrichtn.||
Item sew^e meldent mer, ob das wer, das ain halter oder ein hu^eeter wer in dem veld und kho^em aÿner, wer der wer, unnd wolt den schlahn oder treÿbn aus dem veldt, so wer er von ÿedm raÿn XII d. ze wandl.||
Item sew^e meldent mer, wan aÿner kho^em geritten oder gangn in das veld, er wer edl, unedl und wolt ain an mu^eetwilln ain edler umb zway und dreÿssig pfu^endt, ob man es uberfarn wu^erdt, ein ander umb ein gemains wandl.||
Item sew meldent mer, wan aÿn man den anderen pfendt, so geÿt ain hŷeiger ain pfenning, ain gast zwen, und welcher der ist, der sich pfentn lest, der ist dem richter XII d. ze wandl.||
Item sew^e meldent mer, wie der hu^eeter scholl ŷnthu^een oder phentn ein hŷeiger schol gebn von aÿm spansaÿl ain d., an gast zwen.^e Wen ain hieigen schol ers zwir haÿmtreibn, zw^e dem drittn mal scholl ers ŷnthu^een oder setzet sich ayner ains hu^eeter, wer der wer, umb ein gemains wandl.||
Item sew^e meldent mer von dem Trenebeg,² wan das seÿ, das ein wegmueder man, der khom mit rossn oder mit anderm viech, derselbig scholt seÿne viechl in nattu^erft da essen lazzen und ist nŷem darumb phlichtig. Aber schnit oder hielt ein gesesner es wêr, wer da wer, der wer umb XII d. ze wandl und geb dem hueter sein gerechtigkaÿt.||
Item sew^e meldent mer, wan zwen ain feintschafft an einander hietn und das aÿner den andern heraus vordert au^es seim haw^es, als offt ers thet, so wer er umb zwen und sechs schilling ze wandeln. Schu^ess er aber hŷnŷn in seÿn haw^es oder wolt er den au^esziehn aus seÿm haw^es, so wer der umb zwaÿ unnd dreÿssig pfu^endt.

Source Fulltext: FUCHS, Göttweig III (=FRA II/55, Wien 1902) S. 38-45