In nomine domini; amen. Anno a nativitate eiusdem millesimo quadringentesimo octuagesimo, indictione tredecima, die vero Martis decima nona mensis septembris, pontificatus sanctissimi in Christo patris et domini nostri, domini Sixti, divina providencia pape quarti, anno decimo venerabiles patres domini Wilhelmus de Ahaim prepositus, Valentinus Pernpeckh decanus totumque capitulum ecclesie Pataviensis tunc capitulariter congregati ac capitulum facientes et representantes in nostrum notariorum publicorum testiumque infrascriptorum ad hoc specialiter vocatorum et rogatorum presencia prefatus dominus Valentinus decanus tam pro se quam etiam tocius venerabilis capituli ecclesie iam dicte animo et intencione provocandi et appellandi quandam appellacionis papiri cedulam, quam tunc in suis tenebat manibus, in medium exhibuit atque interposuit ac de verbo ad verbum perlegit provocavit quoque et appellavit apostolos aut saltem litteras testimoniales peciit ac alias et alia duxit et fecit, quemadmodum in eadem appellacionis papiri cedula inferius de verbo ad verbum inserta lacius continentur et habentur, cuius tenor sequitur et est talis: ea, que de facto fiunt male, sua ruunt, etiamsi aliquando ex suggestione circumvento summo pontifice a sede apostolica emanant, cum summus pontifex, que facta sunt, ignorare possit. Et ideo ex importuna petencium instancia aliquando errare aut concedere in preiudicium et derogacionem rite et legittime ultro citroque bona fide pactorum et conventorum, ymmo verius violacionem cathedralium ecclesiarum et earundem iurium ac privilegiorum legittime prescriptorum parte non vocata neque audita in inclita natione Germanica existentium confusionem ac sancte matris ecclesie scandalum non mediocre. Huic nos Wilhelmus prepositus, Valentinus decanus ac capitulum ecclesie Pataviensis gravi cum querela animo et intencione appellandi provocandi seu verius supplicandi citra tamen quarumcumque aliarum appellacionum in hac causa per nos aut pro parte nostra interpositarum derogacionem coram vobis notariis publicis dicimus et proponimus, quod licet nuper videlicet die Veneris,¹ decima mensis marcii (1480 März 10) anni currentis octuagesimi et termino competenti a quadam pretensa provisione electione et confirmatione per sanctissimum dominum nostrum, dominum Sixtum divina providencia papam quartum reverendissimo in Christo patri et domino, domino Georgio de Heseler,² titulo sancte Lucie in Silice presbytero cardinali. de Pataviensi ecclesia nuper vacante contra nostram canonicam eleccionem de reverendo patre domino Frederico Maurkircher, utriusque iuris doctore, canonico et capitulari prefate ecclesie nostri^a Pataviensis necnon illustrissimi principis et domini, domini Georgii, comitis palatini Rheni, inferioris superiorisque Bauarie ducis etc. cancellario, facta ad prefatum sanctissimum dominum nostrum papam certis modis appellaverimus ac in eadem appellacione nostra causas et raciones obreptionis surreptionis nullitatis iniquitatis et iniusticie salva semper superiorum reverentia ipsorum provisionis eleccionis et confirmacionis de ipso reverendissimo domino cardinali factis necnon exorbitanciam contra iuris canonici et civilis disposicionem ac sanctorum patrum ordinacionem necnon gravamina quam maxima non solum nobis et ecclesie Pataviensis, sed etiam toti nationi Germanice quomodolibet inde provenientia sufficienter expresserimus et allegaverimus, que iura in et circa illam facere disponunt ac appellacionis natura exigit et requirit, quam hic etiam pro sufficienter expressa habere volumus et per huiusmodi nostram appellacionem effectum et vim quarundam pretensarum tam provisionis quam censurarum desuper emanatarum exorbitancium bullarum ad instanciam et ut verisimiliter presumitur inordinatum favorem prefati domini cardinalis quomodolibet in hac causa decretarum et concessarum suspenderimus. Nihilominus tamen, ut veridica relacione didicimus et ex scriptis prefati domini cardinalis deprehendimus, ipsum dominum cardinalem vigore pretensarum exorbitancium bullarum suarum se episcopum Pataviensem in ecclesiis et monasteriis opidi Wiennensis audeat mandet et faciat frivole denuntiari et proclamari etiam de nonnullis actibus iudicialibus et iurisdiccione ecclesie nostre Pataviensis necnon officio pontificali et exercitio eiusdem se temere et de facto intromittat, nos et ecclesiam nostram Pataviensem contra deum et iusticiam causa non cognita possessione nostra iuribus et privilegiis nostris et ecclesie nostre iam longo tempore prescriptis spoliare et destituere iure suo pretenso et causa appellacionis nostre adhuc in discussione pendentis re integra et in tractatibus amicabilibus adhuc stante ŷmmo, quod peius est, quemadmodum ad nostram noticiam certis assertionibus prolatum est, cardinalis pretendit et molitur vigore quarundam litterarum monitorialium, penalium et certarum pretensarum censurarum, quarum tamen effectus per nostram appellacionem iamdudum interpositam suspensus est, nos requirere et quantum per eum stat, nos et ecclesiam Pataviensem, eius statum et condicionem, cultum divinum et regimen eiusdem, subditos tam spirituales quam seculares in eorum conscienciis perturbare et confundere, vexaciones iniquas et sancte sedi apostolice, ŷmmo Christiane religioni scandalosas et adverssas mittere in anime sue periculum, ecclesie Pataviensis et tocius nationis Germanice et privilegiorum eiusdem preiudicium et derogacionem ac sancte matris ecclesie et fidei katolice disturbacionem non mediocrem. Sencientes igitur nos et ecclesiam nostram Pataviensem non mediocriter gravatos ac in posterum magis gravari posse, idcirco tam pro nobis ac ecclesia nostra Pataviensi, quam etiam omnibus aliis et singulis subditis ordinis aut conditionis existant ab huiusmodi ut premittitur prefati domini cardinalis et iniquis iniustis conatibus et gravaminibus iam illatis, quam inposterum forsan per requisicionem huiusmodi pretensarum bullarum penalium nobis aut illis quomodolibet inferendis ad sanctissimum dominum nostrum, dominum Sixtum, divina providencia papam quartum, eiusque sanctam sedem apostolicam tamquam male informatum et in facto errasse, melius et de veritate facti informandum appellamus provocamus et supplicamus appellacionesque primo secundo tertio instanter instancius et instantissime, si quis sit, qui nobis illos dare possit, saltem a vobis notariis publicis litteras testimoniales nobis dari petimus submittentes nos, ecclesiam Pataviensem, subditos et diocesanos, quo supra ac nobis adherentes seu adherere volentes, tuitioni et protectioni sanctissimi domini nostri pape ac sancte sedis apostolice prescriptis protestantes de persecutione huiusmodi appellacionis nostre, quomodo ubi et quando secundum iuris disposicionem necessarium fuerit et oportunum etc., salvo iure addendi corrigendi minuendi mutandi ac aliam et alias appellaciones interponendi etc., prout moris est atque stili. Super quibus omnibus et singulis supradictus dominus Valentinus decanus pro se ac nomine predicti venerabilis capituli sibi a nobis notariis publicis infrascriptis unum vel plura publicum seu publica fieri et confici peciit instrumentum et instrumenta. Acta sunt hec in stuba capitulari sub anno indictione die mense hora et pontificatu quibus supra presentibus ibidem venerabili ac honorabilibus et providis viris, dominis: Iohanne Ku^emmost, utriusque iuris licenciato. curie Pataviensis predicte cancellario, magistris: Hainrico de Wending, vicario chori, Leonardo Sattlo^eder, sancte Elisabete, Caspare Kirchpeckh dominorum, et Andree Windel, sancti Sixti cappellarum in ambitu sepedicte ecclesie Pataviensis sitarum capellanis, presbyteris et clericis Pataviensis diocesis, testibus ad premissa vocatis, rogatis et specialiter requisitis.||
Et ego Conradus Kern, clericus Pataviensis, publicus apostolica et imperiali auctoritatibus notarius, quia dicte appellacionis interposicioni apostolorum peticioni et protestacioni omnibusque aliis et singulis, dum sic ut premittitur fierent et agerentur, unacum notario publico et testibus supra et infrascriptis presens interfui, eaque omnia et singula sic fieri vidi et audivi. Ideo hoc presens publicum instrumentum per alium me aliis prepedito negociis fideliter scriptum exinde confeci subscripsi publicavi et in hanc publicam formam redegi signoque et nomine meis solitis et consuetis signavi in fidem et testimonium omnium et singulorum premissorum rogatus pariter et requisitus.||
Et ego Erasmus Wu^eerer, clericus Salczburgensis diocesis, publicus sacra imperiali auctoritate notarius ac decanatus ecclesie Pataviensis scriba iuratus, quia suprainserte appellacionis interposicioni lectioni apostolorum peticioni et protestacioni omnibusque aliis et singulis premissis, dum sicut premittitur sicut et agerentur, unacum honorabili viro domino connotario meo et testibus supranominatis presens interfui eaque sic fieri vidi et audivi. Ideo hoc presens publicum instrumentum per alium me tunc aliis legittime prepedito negociis fideliter scriptum exinde confeci subscripsi publicavi et in hanc publicam formam redegi signoque et nomine meis solitis et consuetis signavi in fidem et testimonium omnium et singulorum premissorum rogatus et requisitus.

Source Fulltext: FUCHS, Göttweig III (=FRA II/55, Wien 1902) S. 160-164