Go^erig von gots gnaden phalczgraf beÿ Rein, herczog in Nidern und Obern Bairen etc. Uns hat gelew^eblich angelanngt, wie ir dreÿ ew von den ersamen in got unser lieben getrewen . . dechannt und capitl des tumbstiffts zu Passaw in den sachen der ainhellig wale fur den erwellten des stiffts daselbs durch ew und das capittel auf allts herchomen ewer freihait gemaine recht und compactata geschehen zu sonderen, alsdann bisher in ettlichen sachen erschinen ist, und darzu in ta^eglichen u^ebung und hênndeln seit solher ewrer wale widerwertig zu sein und dem cardinal Ha^esler als widerpartheÿen. sovill an ew ist, anzehanngen¹ vermaint, uber und wider ewr wale und phlicht, da ir getan habt, und damit ir dem stifft Passaw verpunden und gewont seit. Auch uber und wider das zusagen, so ir tumbprobst uns in aigner person fur ew selbs. in sunderhait auch ir und die anndern zwen mitsambt anndern des capitels uns mermals getan habt, daraus dann dem stifft Passaw merklich irrung und peswa^erung bisher gevolgt hat, daran wir nicht unpillichen merklich befrombdung und missalen von ew haben und begern nachmals ernstlich an ew, ir wellet solhs ewrs unpillichen hanndels und ubung absteen, bei anndern des capitels zu Passau in den sachen die bemellt wale antreffund auf die beru^ert wale und ewr phlicht krefftiklich besten, die hannthaben helffen und ew davon in khain weg abwenndten, sundern noch ew solher wale zuwider ichts pebegen lassen, als ir dann ewren phlichten, auch derselben wale und ewren zusagen noch schuldig seit. Wo wir aber das nicht tu^en, sunder in ewr aigenwillickhait lennger verharren wurdet, so sullet ir ew und die ewren khainer gnaden zu uns versehen. Wir wellen uns auch gegen ew der massen hallten und pebeisen, dadurch ir versteen sullt, das wir an solhen ewren furnemen, hanndlen und ubung ye nicht gevallen haben. Datum Lanndshu^ett an suntag nach converssio Pauli anno domini etc. LXXXI.

Source Fulltext: FUCHS, Göttweig III (=FRA II/55, Wien 1902) S. 179-180