Allerdurchleuchtiger kaiser, allergnedigister herre! Als ÿetz der kunig von Hungern die stat zu Sannd Pollten und Mauttarn, daselbshin er nu^e sein haubtlêut geschikt hat. vermaint inzehaben und da besess zu machen, daraus dann lannd und lewten und nêmlich meinem gotshaws zum Gottweig als in der nêhent und dazwischen gelegen verrer unratt aufersteen mo^echt, nachdem ich aber auf hu^eet desselben ineins gotshaws und pergs den gannczen sumer gross darlegen tan und in den verganngen kriegslewffen sunderlich in dem nagsten velld vor Meirling¹ auch in annder weg von ta^eglicher fu^etrung und robat der unsern grossen schaden genomen hab und die armenlêwt, desgleichen alles annder des gotshaws vermu^egen darunder gennczlich erscho^epht und dargelegt also, das wir nu^e dŷ jarlichen zinns und rênnt nicht zuesteen noch nachfolligen mu^egen, deshalb ich zu widerstand den lanndsveinten mit notturfft nêmlich mit holcz wasser und speis gar klain furgesehen bin, noch fursehen hab mu^egen und zu besorgen ist, das die bemellten veint meinem gotshaws und gesloss als im weg ligunden mit gebalt nachsteen und hart unangesu^eecht beleiben werden lassen. Darauf bitt ich e. k. m., e. k. m. welle genêdiklich weg gedenkhen helffen und raten, dadurch daselb mein gotshaws von den bemellten lanndsfeintten nicht uberdrungen und in ir gewaltsam nicht gebracht werde und der loblich gotsdinst gennczlich beliegen mu^eesse, auch deshalb lannd und lewt weitter schaden vertragen sein. Das etc. E. k. m. diemu^etig gehorsam caplên, brueder Laurencz abbt, Michael prior und der gantz convent zum Gottweig.

Source Fulltext: FUCHS, Göttweig III (=FRA II/55, Wien 1902) S. 195-196