Wir Fridreich etc. enbieten den edlen unnsern lieben getrewen allen und ieglichen unsern haubtlewtten graven herrn rittern und knechten verbesern vicztumben phlegern burggraven burgermaistern richtern ra^etten rottmaistern soldnern dinstlewtten burgern gemaynden und allen anndern unnsern ambtlewtten undertanen und getrewen unnser gnad und alles guett. Nachdem unnser heiliger vatter babst den hochwirdigen in got vatter, unnsern lieben frewndt, herren Jorgen der heiligen Romischen kirchen cardinal titels Sannd Lucien in Silice mit dem stifft Passaw fursehen, den darauf in aigner person geweihet und confirmirt, wir im auch seine regalia¹ und werltlicheit verlihen. hat sein heiligkeit im als bischoven zu Passau gego^ennt von seiner briesterschafft im^agemain stewr, dŷ man zu latein nennet caritativum subsidium, einzunemen, als sich von recht und allter herchomen gebu^ert und sŷ ze tu^en schuldig sein, emphelhen wir ew allen und ewr ÿeglichen besunder bey vermeidung unnser straf und ungnad ernstlich und wellen, ob sich derselben prela^etten und briesterschafft ainer oder mer in gemain oder sunderhait solh stewr zu geben seczen oder widern und ir von dem genannten unnserm fru^endt cardinal oder seinen wegen gegen denselben umb hilff ersuecht wurden, das ir dann von unnsers hailigen vaters babsts und unnsern wegen derselben leib und guetter zu ewren hannden nemet und sy darzu halltet, damit sy solh caritativum subsidium betzallen und sich dem genannten unnserm fru^endt cardinal als irm rechten herren und bischoven gehorsamlich ertzaigen und ew darinn nichts irren noch verhindern lasset. Daran etc. Geben zu Wienn an phincztag nach den heiligen phingstveirtagen anno domini etc. LXXXI, unnsers kaiserthumbs im dreissigisten jaren.

Source Fulltext: FUCHS, Göttweig III (=FRA II/55, Wien 1902) S. 192-193