Am suntag nach sannd Vrbanstag im LXXXXII. iar hat der erbirdig geistlich herr, her Mathias abbt zum Gottweig mit willen und wissen seins convennts daselbs die mu^el gelegen aufm Aigen zenagst ob des Ga^enngl Fridrich haws mit aller irer zugehorung, davon man diennt jarlich demselben gotshaus an sand Jorgentag ain mut korn etc. masz, bringt dorffmass XXV metzen korn, und an sannd Mertentag viertzig phening, verkhaufft dem erbern Wolfgangen Lu^ettich dem mu^ellner und sein erben umb sechtzig phunt phening lanndsberung in Osterreich. Geschehen in gegenburt der erberen weisen maister Petern Mu^ellner von Senfftenberg, maister Fridrich von Rechperg, Veit Wisent von Senfftenberg und annder erber lew^et. Dieselb mu^el ist dem gotshaws zum Go^ettweig zuegestannden und sich der der obgenannt erbirdig herr, der abbt angenomen aus ursach nêmlich, das sŷ lannge jar und tag unstifftlich gelegen und die, so aÿnicherlaÿ gerechtikhait darzu hietten mu^egen gehaben oder vermaÿnetten ze haben, in nicht erschŷnen noch sich dermassen gehallden in kainem weg, dadurch die berurt mul widerumb stifftlich gelegt und zu paw cho^emen wa^er, deshalben benants gotshaws der ia^erlichen dinst, auch annder vordrungen und oberkhait, so davon ze geben und ze tu^en sich gepueren, bisher geratten und grossen schaden genomen hat und nicht zuezesehen gebesen ist, ain solh stukh so nahent dem gotshaws und am hofzawn gelegen ungestifft ze sein. 

Original dating clause: am suntag nach sannd Vrbanstag

Language: Deutsch