Animum etc. Recepimus reverende pater ac domine colendissime die tercia presentis mensis (Sept. 3) frater Iohannes et ego Petrum paternitatis v. r. nunccium harum exhibitorum et litteras, quibus intelleximus regiam maiestatem Romanam dominum reverendissimum Pataviensem ac paternitatem v. r. in conventu principum in Friburgam non mediocribus impensa et iactura occasione differenciarum intencione reverendas dominaciones vestras concordandi accersisse et ob iniquam oratorum prefati reverendissimi Pataviensis peticionem suam regiam maiestatem nil profecisse, sed causam ordine iuris decidendi reverendissimo domino nostro archiepiscopo Saltzeburgensi, prout ex ipsius commissionis copia accepimus, commisisse, quod iudicium omnino refutandum erit propter paternitatis v. r. et monasterii Gotbicensis exempcionem novissime obtentam, quemadmodum ex supplicacionis copia et minuta originali, quas in presenciarum mittimus, accipiet vestra r. p. Et ut facilius tribunale reverendissimi domini Saltzeburgensis tanquam suspectum declinare valeat, fecimus ad instanciam vestre r. p. absolucionis a censuris pretensis copiam ac nullitatis sentencie per reverendum patrem, dominum Bernhardum episcopum Libanensem promulgate cum toto negotio provinciali reverendo et venerabilibus patribus, domino abbati Melicensi ac decano et Leonardo Wulfing, canonico ecclesie Viennensis, cum clausula: quod si non omnes etc., committi, prout in bulla presentis latoris portanda commissum, qua in continenti conveniendi sunt iudices in eisdem deputati hortandi ipsos, imo requirendi eos, ut aliquis eorum, quem duxerit eligendum, onus huiusmodi assumat, citacionem contra ambos Pataviensem et Libanensem episcopos ad videndum paternitatis v. r. capitaneum et quoscunque alios disturbii in monasterio facti conscios ad aliquem terminum brevem eciam feriis non obstantibus saltem ad cautelam absolvi necnon ad dicendum contra literas seu commissiones apostolicas ad primam diem iuridicam, hoc est finitis feriis etc. decernat. Extrahatur quoque eodem momento generalis inhibicio contra quoscunque. Ad effectum, si dominus reverendissimus Saltzeburgensis archiepiscopus ex commissione regali spreta apostolica procederet, eidem inhiberi possit. Arbitror tamen, cum causa ipsa sit odiosa, si ipse reverendissimus dominus Saltzeburgensis certificaretur per paternitatem v. r. de commissione apostolica et exempcione monasterii Gottbicensis, abbatis et membrorum, quod nullo modo se intromitteret. Nichilominus sit paternitas v. r. provisa cum inhibicione. Et ne regia maiestas ex suggestione adversariorum suspicetur huiusmodi commissionem extractam ad impediendam iustitiam, avisentur vestre p. r. promotores in curia regia existentes videlicet, qualiter paternitas v. r. pro absolucione sedem apostolicam adiverit; que absque cause et provincialis negocii cognicione, unde censure ecclesiastice progredi pendebantur, denegabatur. Coacte itaque recepta fuit commissio ad partes absolucionis cum examine tocius negotii maxime nullitatis. Preterea vestre r. p. in Friburga existentes sollicitatores ad regie maiestatis scripta ad summum pontificem missa exempcionem Nicolai felicis recordacionis pape V. eiusque bullas cum omnibus in eis contenta confirmari obtinuerunt in huiusmodi exempcionis. que fatigiis et impensis difficulter obtenta fuit, non parvum preiudicium, nisi denuo ab ea recedere velletis, coram reverendissimo domino Saltzeburgensi prefato litigare minime liceat, ex quo nullum nisi summum pontificem aut specialiter ab eo delegatum cognoscere possitis. Coram iudicibus in rescripto datis sitis contentus, reverendissimo domino Pataviensi et quibuscunque impetitoribus, in quantum eis iurisdictio competat, respondere, ne videamur velle absque racione vitam degere. Hiis facile indignacio, si qua concepta foret adversariorum sugestione, a precordiis regie maiestatis propulsabitur. Absolucione obtenta instruenda erit causa nullitatis super pretensis visitacione et censurarum iniqua fulminacione et pro huiusmodi sentencia summopere laboretur. Ex adverso si deducuntur malum regimen, dilapidacio bonorum et huiusmodi facinora abbatis, prout coram regia maiestate similia exposuerunt, replicetur ista respicere negocium provinciale terminandum. Finita causa nullitatis casu, quo aliqua ferretur sentencia etiam qualiscumque et pro quacunque parte et ab eadem appellatione mittatur in continenti instrumentum appellacionis ad me. Si fuerit partis adverse, faciam universam huiusmodi appellacionem cum toto negocio in rotam committi et mittam inhibicionem ad partes. Si ex parte nostra interiecta fuerit aliqua appellacio, committetur iudicibus in partibus nobis faventibus. Hoc omnino paternitas v. r. memorie servabit. Causas, quare frater Ioannes tanto se tempore a monasterio absentaverat, ex ipso vestra paternitas reverenda intelliget. Breve exemptionis, de quo alias sepius scripsi, per medium domini Petri de Carantza, sanctissimi domini nostri pape camerarii, expeditum et obtentum in captura secretarii domini archiepiscopi Cusantini perditum ivit et cum post multas diligencias de reperiendo habitas papa sciens huiusmodi concessionem per eum factam pluribus promissionibus de concedendo sub priora data aliud nos suspendit. Tandem nescio, quibus auspiciis litere regie maiestatis papam increpantes de ante data supervenerunt effeceruntque, ut de cetero nulla detur ante data, sicque coacti sumus recipere datum tunc currentem, prout est in supplicacione exempcionis. Pro composicione compulsi dedimus datario ducatos centum. Sumus in expedicione litterarum huiusmodi, quas scriptores apostolici taxare primum nitebantur ad ducatos triginta, que taxa solvitur quatuor vicibus, deinde ad XX descenderant ducatos, hodie ad quindecim, sed nullam illarum volui recipere. Spero amicorum interventu leviori taxa ipsas me expedituras. Ob huiusmodi litterarum expedicionem fratrem Iohannem reservavi mecum, ut sciat referre rem gestam, quibus taxatis ipsum dimittam. Feci obligacionem in banccis Fugkarorum vigore constitucionis per paternitatem v. r. alias in Urbe coram Iohanne Hagenwiler notario facte pro centum et LX ducatis, quibus negocia paternitatis v. r. expedicioni dabimus et omnes impensas per dictum fratrem Iohannem factas exsolvemus. Predictos centum et sexaginta ducatos cum interesse Saltzeburge solvi debent nostro Froschelmoser, ubi bulle exempcionis deo favente futuro invenietis mense expeditas, beatissime et unas litteras conquestus contra cives in Mautarn in presentiarum quoque mittimus. Hiis paternitatem v. r. optime valere cupio, cui me tanquam deditissimum mancipium commendo. Ex Urbe die 14. septembris anno etc. 1498, Eximie r. p. deditissimus inservitor Rupertus Spiegl.

Source Fulltext: FUCHS, Göttweig III (=FRA II/55, Wien 1902) S. 347-350