Beatissime Pater! Cum alias devota creatura vestra Cristofferus episcopus Pataviensis fama scandalosa per totam illius diocesis suborta contra personam Mathie se modo pro abbate monasterii Gotwicensis gerentis ordinis sancti Benedicti eiusdem, Pataviensis diocesis ex officii sui debito canonice inquiri fecisset et in dicti Mathie persona enormia delicta, propter que digne ab abbacia deponi meruisset, comperta fuissent ipseque Mathias deinceps ab huiusmodi excessibus velle abstinere promisisset et propterea delictorum indulgenciam tunc obtinuisset, ad vomitum tamen rediens idem Mathias peiora mala et detestabiliora crimina perpetrare non erubuisset. Ne igitur creatura vestra quiescendo publica scandala confovere et curam sibi commissam negligere videretur, certis sibi honestis et devotis prelatis adiunctis in prefato monasterio iterum inquirendo Mathiam ipsum deteriorem, magis facinorosum, incorrigibilem ac prorsus inutilem prelatum invenit, ad cuius correctionem, ut demerita sua exigebant, ulterius procedendi sanctitatis vestre devoto oratori Bernardo episcopo Libariensi, eius suffraganeo, negocium inquisitionis, uti dimissum fuit, commisit, qui servatis iure servandis ipsum Mathiam a regimine et administratione dicti monasterii deposuit et privavit. A qua quidem sentencia, licet fuisset per prefatum Mathiam ad sedem metropoliticam ecclesie Salzeburgensis appellatum, ipsa tamen sentencia ob appellationis non prosecutionem infra debitum temporis in rem iudicatam transmisit. Nichilominus dictus Mathias per falsam ut creditur suggestionem causam pretense appellationis sue certis iudicibus in partibus per rescriptum apostolicum committi obtinuit, coram quibus pro parte dictorum creature vestre et prefati episcopi Libariensis etiam in causam tracti nonnulle exceptiones etiam fori declinatorie date ad probandum admitti petite fuerunt, ipsi tamen pretensi iudices exceptionibus huiusmodi tacite repulsis nonnulla alia gravamina ipsis oratoribus intulerunt, a quibus repulsionis et in instrumento appellationis desuper confecto expressis gravaminibus fuit et extitit pro parte dictorum creature vestre et prefati episcopi Libariensis ad sanctitatem vestram et sedem apostolicam provocatum et appellatum. Igitur cum causa huiusmodi sit valde gravis et inter prelatos agatur, dignetur eadem sanctitas vestra causam et causas appellatonis et appellationum posterioris huiusmodi ac nullitatis processus dictorum iudicum attemptatorumque et innovatorum quorumcumque post et contra huiusmodi appellationem ac negocii principalis coniunctim vel divisim alicui ex reverendis patribus. dominis causarum vestri sacri palacii apostolici auditoribus committere et mandare summarie simpliciter et de piano et conventus constito sibi de non tuto accessu ad personam eiusdem Mathie etiam extraiudicialiter et extra Romanam curiam citationem per edictum publicum exequendi decernat et per edictum citari ipsum mandet audiendi cognoscendi decidendi et fine debito terminandi cum emergendis incidendis dependendis annexis et connexis ac potestate dictum Mathiam in Romana curia et extra eam etiam per edictum ut prefertur citandi ac dictis iudicibus et quibuscumque aliis, quibus fuerit inhibendum. inhibendi. Non obstantibus quod causa seu cause huiusmodi ad ipsam Romanam curiam forsan legitime devolute seu in eadem de sui natura aut ipsius necessitate tractande vel finiende non existant ac constitutionibus et ordinationibus apostolicis ceterisque contrarium facientibus non obstantibus quibuscunque.

Source Fulltext: FUCHS, Göttweig III (=FRA II/55, Wien 1902) S. 356-357