Reverende pater, domine colendissime! etc. Heri cena peracta presentium exhibitor dominus Iacobus literas vestre r. p. mihi presentandas sibi commissas prius lectas et apertas presentavit. Cui primum eas consignaverit, et eius in Urbem adventum, ipse paternitati v. r. declarabit. Postquam legissem literas memorantes nonnulla puncta in quodam memoriali ad expediendum annotata, interrogavi pro eodem memoriali. Quod, cum non haberet, misi eum pro eodem, quod quoque presentavit. Veneris XXVIII. huius dominus abbas Lutzenburgensis per suum familiarem me rogatum habuit, ut ipsum visitare dignarer, quod finita audiencia ad statim implerem. Idem abbas exhibuit quasdam vestre r. p. litteras, quibus continebatur me ex bancho Fugkarorum et absque paternitatis v. r. mandato percepisse ducentos et XL ducatos, de quibus nullam hactenus reddidissem racionem, dantes tacite intelligere dictas pecunias in alium quam paternitatis v. r. et monasterii usum convertisse, de quo non parum dolebam, cum de pecuniis ad me missis teste deo unum in meum commodum obulum non ordinaverim. Et ut paternitas v. r. de singulis per fratrem Iohannem bone memorie et me gestis plenam capiat noticiam et expositionem racionem per eum et me sepius antea scriptis, vestre r. p. ad infrascripta oculos legenda prebeat. Die 14. iulii dictus quidem frater Iohannes anno 97 spoliatus omnibus rebus in Urbem [per]^a pedes venit, quem in hospicium meum, ut obligabar, intuitu vestre r. p. collegi. Idem cum quodam cive ex Hallis Eni, qui secum venerat non tamen spoliatus, vestre r. p. pro certis pecuniis pro sui sustentacione et negociorum sibi commissorum expedicione scripserat. Ad eius scripta in banchum Fugkarorum fuerunt ordinati ducati centum, quos pro sola signatura exempcionis pontifici presentare cogebamur, prout ex crebris meis litteris et ipsius abbatis, qui eos datario pro huiusmodi signatura obtulit, vestra r. p. accepit. Habita signatura non erant pecunie pro litterarum expedicione, sine qua dictus quondam frater Iohannes domum redire nolebat. Habui ad recursum ad constitucionem procuriarum factam per p. v. r., dum erat in Urbe, in quo doctor Maximilianus et ego constituti et quilibet nostrum in solidum sumus ad obligandum paternitatem v. r. et monasterium pro ducentis ducatis, vigore cuius mandati dictus quondam frater Iohannes et ego ex dicto bancho recepimus ducatus centum et sexaginta absque interesse, quod forsan iuxta mercatorum consuetudinem seu verius taxam sexdecim ducatorum vel aliquid ultra est. De praedictis pecuniis exposuimus infrascripta inprimis pro bulla in forma ,humilibus', vigore cuius paternitas vestra cum aliis, qui disturbio interfuerunt, absoluti fuerunt, ducatos XII pro litteris ,conquestus' carolinos VII. pro duobus beatissime seu confessionalibus unum paternitati v. r., alterum N. Ebmer novissime cum domino Iohanne Ruedl cum ceteris copiis missis carolinos octo, fratri Iohanni bone memorie pro uno equo ducatos decem, summa illorum viginti tres ducati et carolini III pro bullis exempcionis, pro supplicacione carolinos V, pro eius redempcione ex registro carolinum I, ex cancellaria carolinos V. Abbreviatori, qui fecit minutam, ducatum I, scriptori pro carta et salario ducatum I, eius familiari pro bibalibus carolinum I, item scriptoribus apostolicis, qui habent unam taxam, ducatos XII. Ad eosdem ex gracia obtinuimus bullam taxari generosius ducatos II carolinos II. Abbreviatoribus, qui habent taxam secundam, ducatos XI carolinos V, in prima visitacione carolinum I, in plumbo, ubi solvitur tertia taxa, ducatos XII et plumbatoribus carolinos XIII. In registro bullarum, ubi solvitur quarta taxa, ducatos XII carolinum I, pro registratura bulle carolinos VI, pro redempcione supplicacionis a custode carolinos VIIII, item magistris in registro bullarum pro composicione ducatos V. Summa LVIIII ducati, carolini V. Iem notario in bancchis, qui recepit obligacionem, ducatum I; item copiste, qui fecit instrumentum obligacionis, carolinos III; item pro sumpto bulle exempcionis Nicolai pape V. ducatos in auro III, carolinum I; item domino Iohanni I ducatum, Conrado magistro carolinum I, qui emit eidem equum, pro speltis carolinos IIII, pro feno carolinos II, libras duas; item apothecario pro medicina carolinos VI; item medico florenum Rhenensem unum; item pro speltis et feno carolinos VIII; item ipsi domino Iohanni carolinos VI, pro feno carolinos III libras III, pro spelta carolinos III libras III d. II, iterum pro speltis carolinos VIII, item pro speltis bolendis IIII, item pro feno et speltis carolinos III libram I, 1 d., in summa ducatos IX carolinos VII libras VI 1 d. Deinde inter computata fratris Iohannis quondam percepta ex me infrascripta: iterum I ducatum. item VI carolinos, item carolinos VI, iterum I ducatum, florenum Rhenensem I, carolinos V, carolinos II, carolinos IX, carolinos III, VI quidem grossos, florentinos II, carolinos I, item pro feno carolinum I, sufferrando IIII grossos Florentinos, pro stramine carolinos III. pro feno carolinos IIII, pro spelta carolinos VIII, pro ordeo carolinum I, pro quatuor paribus calceorum carolinos VI libras III, pro antiquis ocreis reformandis carolinum I, pro medicinis pedis frontisque carolinos IIII, pro uno bireto carolinos III, pro ventosis carolinos II, pro ocreis novis carolinos V, pro vestibus reformandis carolinos III, pro albis calceis propter egritudinem pedis carolinum I libras V, pro candelis successive carolinos III, pro lignis ad hiemem libras V, pro chirothecis carolinum I. Hec de manu sua apud me sunt annotata. Summa: ducati IX carolini VIII libre IIII d. III. Summarum: ducati centum et duo libre III d. III. Fuit preterea dictus quondam frater Iohannes in expensis meis per annum et menses octo dies XVI, ubi pro qualibet ebdomada ponatur I ducatus. Hec sunt exposita per me iterum de receptis ex bancho Fugkarorum videlicet centum et sexaginta ducati, in residuo paternitas v. r. mihi obligata manet. In Urbe per episcopum Pataviensem nil novi attemptatum preter citacionem extractam, qua, ut retulit mihi cursor episcopi Pataviensis, missus fuit notarius ad exequendam eam. Si sic esset, mittetis de singulis gestis claram ad me informacionem, etiam iura et litteras Prenner super jagersuppen. Non est opus citacione super iniuriis contra episcopum Pataviensem. Ego eas clare deducam, si redierit execucio citacionis. Nichilominus specificentur clare in missivis ad Urbem. De incorporacione ecclesiarum hoc tempore nil attemptandum est, quia papa senex et si moreretur, omnes expense essent perdite, quia verosimile est eum cicius mori, quam rectores et successores revocaret, omnes incorporaciones non sortirentur effectum, que sine magnis pecuniis haberi non possent. Misi citacionem contra dominum Gregorium Pintter super parochiali ecclesia in Nalib et spero eam ab eo evincere. Citacio est in Tulln cum Ioanne Riedinger. Ergo procuretur ut exequatur. Geyer obtinuit ecclesiam in Kulb revocata et sentencia pro Michaele Huepler lata. Obtuli dominis clericis in camera apostolica pro iocalibus 24 ducatos pro bulla exempcionis, qua habita dominacio vestra reverenda poterit recipere crisma ordinaciones ecclesiarum etc. a quocumque antistite. Eciam modo propter transsumptum pape Nicolai alias transmissum iubileum ad modum universalem non possem habere mille ducatis nec credo, quod alicui dabitur nisi magnis pecuniis, denegatum et hiis diebus domino reverendissimo Saltzburgensi, qui propterea specialem habuit oracionem in Urbe etc. His paternitatem v. r. optime valere cupio, cui me unice commendo. Ex Urbe die prima iulii anno etc. 99. Alia ex litteris cum prefato domino Iohanne Ruedel missis vestra intelliget r. p.||
Per paternitatis v. r. deditissimum inservitorem Rupertum Spiegl.

Source Fulltext: FUCHS, Göttweig III (=FRA II/55, Wien 1902) S. 363-366