Reverende pater, domine colendissime! etc. Ex meis superioribus litteris paternitas v. r. habuit intellexisse fratrem quondam Iohannem, professum montis Gotbicensis, alias in negociis paternitatis v. r. et vestri monasterii ad me missum, morbo Gallico misere occubuisse. Habebat per plura tempora ante eius obitum faciem homini multum dissimilem, carebat nasu ipso morbo abesu, item oculo uno, praeterea caput tumoribus ingrassatum ipsum inagnoscibilem reddens. Fetebat insuper, ut quisque hominum eciam statuto quocunque precio eius curam gerere pertimescebat. Tandem ne incomitatus mortem obiret, ordinavi ipsum in hospitale s. Iohannis in vigilia pasce (März 30), in quo summa adhibita cura octo diebus vixit et postea animam suo creatori reddidit. Est quoque in cimiterio hospitalis eiusdem, ut presbyterum decet, honorifice subterratus. cuius anima requiescat in pace. Procuravi nonnullas missas in sanctorum Iohannis Sebastiani et Gregorii ecclesiis pro eius anima celebrari, residuum exequiarum committo paternitati v. r., pro cuius honore et monasterii commodo spiritum emisit. Exposui pro medicis, aromatariis et aliis pro recuperanda eius sanitate ordinatis ducatos septem. Mansit preterea pro expensis obligatus mihi in ducatos XV, qui insimul constituunt ducatos viginti duos, prout ipse dominus Iohannes harum exhibitor calculum vidit. Eosdem perditum ire vellem, utinam superviveret. Commendavi ipsi domino Iohanni paternitatis v. r. presentandi bullarum copias alias apud me, dum paternitas v. r. erat in Urbe, relictas, item transsumptum bulle Nicolai ex camera non parvis laboribus et impensis extractum, quod optime propter conservatores in ea deputatos custodire suadeo. Insuper exhibebit quoddam sumptum cuiusdam confessionalis pro nobili viro, domino Martino Egenburger eiusque uxore et liberis, quod p. v. r. eidem presentari faciet. Laboravimus hiis diebus extreme pro ipsa bulla exempcionis habenda, pro qua clerici camere quinquaginta ducatos pro iocalibus petunt. Obtuli viginti, sed recusarunt. Videbo, si XXX haberi possit, quos Iohannes Zinck, factor Fugkerorum in Urbe, mutuare intuitu paternitatis v. r. promisit. Si eosdem quoque recipere recusabunt; supersedere statui, donec mentem paternitatis [v. r.] super ea re habuero. Videtur mihi summa L ducatorum nimis exhorbitans. Huius bulle originalem, supplicacionem manu propria pontificis signatam in presenciarum quoque mitto. Kilianus Geÿr his diebus obtinuit sentenciam alias in favorem Michaelis Huepher super parrochiali ecclesia in Kulb vestre r. p. collacionis latis revocari et titulum et collacionem ordinariam canonizari. Ceteram ipse dominus Iohannes enarrare sciet. Hiis me paternitati v. r. ad vota paratissimum offero. Ex Urbe die nona iunii anno etc. 99.||
Eximie p. v. r. deditissimus inservitor R(upertus) Spiegl.

Source Fulltext: FUCHS, Göttweig III (=FRA II/55, Wien 1902) S. 360-361