In nomine sancte trinitatis et indiuidue unitatis. Andreas dei gracia Hungarie, Dalmatie, Chroatie, Rame, Seruie, Galicie, Lodomerieque rex in perpetuum. Munificentie regalis inmensitas, licet etiam ad extraneos usquequaque dilatari debeat, ad illos tamen copiosius manum pietatis debet porrigere, qui et temporalium bonorum impensum sibi fideliter obsecuntur, et in offerendis oracionum sacrificiis pro pace regis et regni deo iugiter ac deuote famulantur. Nos itaque, prout regie circumspectionis erudicio nos ammonet, ecclesiarum christo militantium curis diligenter intendentes diuine pietatis intuitu terram quandam nomine Leginthov, quam bisseni prius incolebant, abbatie sancte crucis de Austria contulimus in perpetuum possidendam. In cuius terre possessione expulsis clericis super eam indebite comorantibus per nostrum pristaldum fidelem et dilectum Pottonem comitem abbatem et monachos eiusdem ecclesie legittime fecimus introduci. Cuius terre mete sie incipiunt. Prima meta incipit a metis ville Galus iuxta fertev lacum site, et protenditur contra orientem iuxta possessionem pethlen vocatam, et transit ultra terram Bissenorum usque ad colliculum geshelevhalm vocatum. Ab illa meta incipit secunda meta in ipsa planitie contra septemtrionem in colle, per huius vero deuexum processus parumper pertransit distinctas metas terreas Hotar vocatas ultra monticulum, in planitie vero ample pascue extremitatem lignorum thaetas nominatam per modicam vallem iuxta finem ipsius silue, que etiam longa vallis nuncupatur, et recto tramite dirigitur secundum distinctas metas usque ad regiam viam, per quam ad hegeshalm usque peruenitur, et sie tercia meta per transuexum late vie contra occidentem protenditur, et prostremo in metis ville predicte Galus concluditur. Predictam vero terram cum vniuersis pascuis, terris arabilibus, cultis et incultis sic ob remedium nostrorum peccaminum prefato monasterio sancte crucis, abbati et conuentui donauimus, ut sibi in ipsa terra mansionem monasticam ad nutrienda animalia, prout ipsorum facultas hoc elaborare ad omne ipsorum beneplacitum valebit, siue villam in ea ad uotum construendo, aut vineta pro se ipsis uel pro ipsorum hominibus plantando, et omnem utilitatem ipsorum exercendo plenariam habeant potestatem. Volumus etiam, eos esse liberos in portubus, pontibus, ampnis, stangnis, lacubus et in omnibus locis regni nostri, siue importando sua sev exportando nostra donaria, vel si qua ad usus ipsorum fratrum in regno nostro comparauerint, ab omnibus tributariis, monetariis, ab omnibus exactionibus illesos permanere. Predictos etiam fratres et omnes ipsorum Jobagiones cum omnibus ipsorum prouentibus sic extra cameram nostram ab omni grauamine et exactione atque infestatione ipsius lucri camere ita liberrimum et exemptum esse uolumus, sicut nobis a deo in nouissimo die retribui cupimus. Istud etiam non est pretermittendum silentio, quod propter anime nostre remedium donationem de tribus milibus Zwanorum, quos nostrorum antecessorum, patris atque fratris regum inclite memorie, diligens pietas dicto monasterio contulerat, iterato auctoritatis nostre priuilegio confirmamus, ita videlicet, ut extra rationem et fisci nostri computum a salinariis preter quorumlibet exactionem tributorum auxilio Supprunensis comitis annuatim in Suprun ad festum sancti regis iure perpetuo libere persoluantur. Has etiam gracias et libertates monasterio sancte crucis et personis inibi deo iugiter famulantibus a predecessoribus nostris factas invenimus, et vigore presentium iterato ipsis confirmamus. Videlicet, quod predicta curia ipsorum Leginthov siue nouum predium cum villa adiacente similiter nouum predium vocata, et curia regis, et similiter villa dicta Sasun siue Winden, et alia villa Podesdorf vocata iuxta lacum ferthev site ab omni donatione, collecta, steura, contributione, solucione, exactione seu dicatione qualibet nomine regio exigenda, uel ciuitatum seu quorumlibet exactorum aut exigere volencium libere sint penitus, et exempte et absolute habeantur, nec lucrum camere nostre nobis siue exactoribus camere nostre soluere tenebuntur. Verum quia, quod deo datum est, sanctum est, id est irreuocabile, ut hec a nobis supradictis terris nec non a nostris antecessoribus saluis facta donatio nostris nostrorumque successoribus temporibus salua semper et inconcussa permaneat, presentem concessimus paginam vniformis sigilli nostri munimine imperpetuum roboratam. Datum per manus Hugrini magistri regie aule cancellarii anno dominice incarnationis millesimo ducentesimo septimodecimo, venerabili Johanne Strigoniensi, reuerendo Berchtoldo Colocensi archiepiscopis existentibus, Kalano Quinqueecclesiensi, Wilhelmo Vltrasiluanensi, Desiderio Chenadiensi, Petro Geurgiensi, Roberto Wesprimensi, Thoma electo Agriensi, Stephano Zagrabiensi, Jacobo Vaciensi, Symone Waradiensi episcopis feliciter ecclesias gubernantibus, Jula palatino, Bancone Bano, Dyonisio Tauarnicorum magistro, Ochuz curiali comite, Rophaym voiuoda, ceterisque comitibus comitatus tenentibus. Regni nostri anno tertio. (sic.)

Source Fulltext: WEIS, Heiligenkreuz (=FRA II/11, 1856) S. 50-52