Universis Xti fidelibus praesentes litteras inspecturis Guido miseratione divina tituli sancti Laurentii in Lucina presbyter Cardinalis, apostolicae sedis legatus salutem in domino. Quoniam ut ait apostolus omnes stabimus ante tribunal Christi, accepturi prout in corpore gessimus sive bonum fuerit sive malum, oportet nos diem messionis extremae misericordiae operibus praevenire ac aeternorum intuitu seminare in terris, quae multiplicato fructu colligere valeamus in coelis, firmam spemfiduciamque tenentes, quoniam qui parce seminat, parce et metet, et qui seminat in benedictionibus, de benedictionibus et metet vitam aeternam. Cum itaque monachi sanctae crucis Cisterciensis ordinis, pataviensis dioecesis, religione conspicui sanctitate debita in sua professione domino jugiter famulentur ac lanam suam ex animalibus suis provenientem pro vestium suarum solatio fidelibus uendam dare consueverint, universitatem vestram monemus, rogamus et hortamur attente vobis in remissionem peccaminum injungentes, quatenus lanam, quae vobis a dictis fratribus tradetur, nere fideliter studeatis, ut per subventionem quam in hac parte dictis fratribus feceritis ad aeterna possitis felicitatis gaudia pervenire. Nos autem de misericordia dei et auctoritate nobis a domino papa concessa confisi omnibus vere poenitentibus et confessis, qui eosdem fratres juverint in praemissis, XX dies de injunctis ipsis poenitentiis misericorditer in domino relaxamus. Datum Wienne, kalendas Maii, pontificatus domini Clementis papae IIII^ti anno III^o.

Source Fulltext: Zisterzienser-Chronik 11 (1899) S. 248