Nos Chunradus plebanus de Slevntz in causa, que inter magistrum H. plebanum de Gors ex vna et Ottonem Saxonem filium Ottonis Saxonis de Etzleinsdorf ex parte altera vertitur, iudex a domino Wernhardo venerabili Patauiensi episcopo delegatus, et Wulvingus de Svnnenberch, scire cupimus vniuersos presencium noticiam habituros, quod Otto dictus Saxo de Etzleinsdorf filius Ottonis Saxonis per fidei sue interposicionem spontanea voluntate promisit et se strictius obligauit magistro Heinrico plebano de Gors, quod censum, quem de quodam manso, quem possidet in predicta villa Etzleinsdorf, ecclesie in Gors tenetur persoluere, videlicet septem solidos longos denariorum wiennensium minus decem denariis eiusdem monete, predicto magistro H. et suis successoribus vniuersis quolibet anno in festo sancti Michaelis integraliter et qualibet excusacione remota persoluet‚ in omnem euentum addiciens et in penam transgressionis sue sponte promittens, quod, si vnquam aliquo anno censum prefatum in festo predicto vel saltim in sequenti die proximo soluere et magistro H. prehabito suisque successoribus destinare pretermitteret, ex tunc statim priuatus esse debeat ipso facto omni iure, si quod sibi uel suis heredibus in bonis pretactis competit vel competet infuturum ita, quod ex tunc omne ius ipsius siue sit purchreht siue aliud sibi in eisdem bonis competens, et omnia, que ad instaurationem predictorum bonorum idem Otto tam in edificiis quam etiam in cultura et aliis informationibus inpendit hactenus et inpendet in posterum, in prenotatam ecclesiam ex negligencia sev dilatione solutionis census prehabiti plenissime sit translatum et ipse Otto statim ab omni iure et possessione qualibet ceciderit ipso facto, nulla sibi actione super predictis penitus reseruata, et hanc penam idem Otto subire coram nobis libere acceptauit. Renunciavit etiam idem Otto ex nunc bona fide omni actioni et omnibus iuris auxiliis, que sibi ad repetendum tunc bona prehabita vel se in eisdem bonis ac ipsorum possessione defendendum competere uidebuntur, ita quod simpliciter possessionem predictorum bonorum tam pro se quam pro suis heredibus vniuersis cum omni iure sibi in eisdem competente fide super hoc prestita promisit dimittere, si, ut promisit, vnquam aliquo anno censum prenotatum in ipso die sancti Michaelis vel proximo die ipsum festum immediate sequentem obmitteret presentare. Adiecit etiam idem Otto et in penam transgressionis sue voluntarie assumpsit, quod, si predictum promissum ipsum contingeret violare, et censum prefatum ipso die festo sancti Michaelis vel die proximo immediate idem festum sequente prefato plebano et successoribus eius non transmitteret, ex tunc preter penam priuationis bonorum predictorum expressam superius ipse Otto plebano de Gors, qui pro tempore fuerit, in decem libris denariorum wiennensis monete esse debeat obligatus, ad quas tunc soluendas ex nunc per promissum sue fidei voluntarie se astrinxit. In predictorum autem omnium testimonium presens scriptum super hoc confectum sigillis nostris duximus muniendum. Actum et datum in Slevntz anno domini Millesimo CC° LXXX° VIII° sexto kalendas Februarii.

Source Fulltext: WEIS, Heiligenkreuz (=FRA II/11, 1856) S. 319-320