Ich Dietreich von Pilchdorff Marschalch in Osterrich vergieh vnd tun chunt allen den, die disen prief lesent oder horent lesen, di nv lebent vnd hernach chvnftich sint, Daz ich mit gutem willen vnd gvnst meiner housvrowen, vron Soffeyen vnd ouch meiner Prudere, hern Ulreichs vnd hern Otten von Pilchdorff vnd aller meiner vreunt ze der zeit, do ich iz wol getun mochte, geschafft vnd geben han dem chloster vnd dem conuent datz dem heyligem chreutze in Osterrich grawes ordens ledichlichen vnd ewichlichen ze haben mein zwen weingarten, die mein rechtes chovfgut sint vnd ligent bei Presburch an der hochnei, mit allem dem rechte vnd ich si her han pracht in nutz vnd in gewer vnd in gewalt vnuersprochenlichen vncz ovf disen tag, durch got vnd durch meiner sele hail willen, vnd besvnderlichen durch meines lieben herren sele willen, Chvnich Rvdolffes von Pehaimen, dem got gnade vnd durch aller meiner vodern willen also mit ovzgenommener rede, daz sie ewichleichen alle tage zwo Messe haben schvllen vnd dar inne Got fvr uns pitten schvllen, vnd vnser alle iar an vnserm iartage gedenchen nach ires ordens gewonhait vnd schvllen fvrbaz allen den nutz, der do wirt vber das paw von den vorgenanten zwain weingerten geben gar vnd genczlichen den siechen vnd den petterisen (sic) ze Pezzerunge ire phrvnt in ir Siechhovs. Vnd daz dizze geschefte vnd dizze gabe gancz vnd vnzebrochen beleibe, dar vber so gieb ich vorgenanter Dietrich von Pilchdorf, Marschalch in Osterrich dem egenantem chloster vnd dem conuent daselbes datz dem heiligem chrevtze in Osterreich disen prief ze einem waren gezevge vnd ze einer ewigen vestnvnge diser sache versigelten mit meinem Insigel vnd mit meiner Pruder Insigel, hern Vlreichs vnd hern Otten von Pilchdorff, di dises gescheftes vnd diser gabe gezevge sint mit ir Insigeln. Der prief ist geben ze wienne, do von Christes geburt ergangen waren Drevtzehen hundert iar‚ darnach in dem Sechs vnd zwainczigisten iare, an sand Thomas tag vor weihnachten.

Source Fulltext: WEIS, Heiligenkreuz (=FRA II/16, 1859) S. 112-113