Ich Vlrich von Pilichdorf vnd ich Jeutt sein hausvrowe, Wir veriehen vnd tvn chunt allen den, die disen prief lesent oder horent lesen, die nv lebent vnd hernach chvnftich sint, daz Paul der Moer von Nidernleizze vnd sein hausvrowe vro Peters vnd ir erben von vns zv rechtem lehen gehapt habent Drev phvnt wienner phenninge geltes auf zwain lehen behauster holden gestiftes gvtes, die da ligent datz Nodendorf, mit alle dev vnd dar zv gehort ze velde vnd ze dorf, gestift oder vngestift, versuecht oder unversuecht; swie so daz genant ist; vnd habent daz selb gut verchauft vnd zechauffen geben den erberrn Geistlichen levten Prvder Jacoben, zv den zeiten Apt zv dem Heiligenchrevtz vnd der Samnvnge gemaine, als si besunderlich prief von in habent versigilt mit meinem insigil vnd mit Paulen insigil des Moer vnd mit seines pruder insigil Jansen. Die aigenschaft der vorgenanten gvlte haben wir mit vnser erben gvten willen vnd gvnst mit verdachtem mute vnd mit gesampter hant zv der zeit, do wir iz wol getvn mochten, aufgeben den egenanten Geistlichen levten zv dem Heiligenchrevtz fvrbaz ledichlichen vnd vreilichen ze haben vnd allen irn frvmen da mit ze schaffen, verchauffen, versetzen vnd geben, swem si wellen an allen irresal. Vnd sein auch wir Ich vlrich von Pilichdorf vnd ich Jeute sein hausvrowe vnverschaidenlich mit sampt vnsern erben der vorgenanten aigenschaft der egenanten gulte vnd swaz dar zv gehort, als vorverschriben ist, der vorgesprochen Geistlichen leute zv dem Heiligenchrevtze vnd aller ir nachchomen rechter gewer vnd scherm fur alle ansprach, als aigens recht ist vnd des landes recht ze Osterreich. Vnd daz disev sache fvrbaz von vns vnd von allen vnsern nachchomen, also ewichlichen stet vnd vnverwandelt beleibe, dar vmb so haben wir in geben disen prief zv einem offen vrchvnde, vnd zv einem waren gezeuge vnd zv einer ewigen vestnunge diser sache versigilten mit vnserm Insigil vnd mit hern Hadmars insigil des Stuchsen von Trautmanstorf, vnd mit hern Weichartes insigil von Toppel zv den zeiten Lantrichter in Osterreich, die Paide diser sache gezeug sint mit im insigiln. Diser prief ist geben nach Christes geburt Drevtzehenhvndert iar, dar nach in dem Dreitzigisten iar, an sand Gregorien tage.

Source Fulltext: WEIS, Heiligenkreuz (=FRA II/16, 1859) S. 132-133