Ich Paul der Maer von Nidemleizze vnd ich Peters sein hausvrowe, Wir veriehen offenlich vnd tvn chvnt allen den, die disen prief lesent oder lesen horent, die nv lebent vnd hernah chvnftich sint, daz wir mit Willen vnd gvnst Jansen des Maern, mein vorgenanten Pauleins pruder Vnd seiner hausvrowen vron Marein vnd ander vnser erben mit verdachtem mvte vnd mit gesampter hant zv der zeit, do wir iz wol getvn mochten, Vnd auch mit vnsers lehenherren hant, herrn Otten des Tuerssen von Rauchenekke verchauft haben vnsers rechten lehens, das wir von im ze lehen gehapt haben, zehen Schillinge wienner phenninge geltes auf einem lehen behauster holden gestiftes gutes, daz da leit datz Nodendorf, mit alle dev vnd dar zv gehort ze velde oder ze dorf, gestift oder vngestift, versvecht oder vnversvecht, swie iz genant ist, mit allem dem nvtz vnd recht, als wirs in lehens gewer herpracht haben, Vmb Sechtzehen phvnt wienner pfenninge, der wir recht vnd redlich gewert sein, den Geistlichen levten Pruder Jacoben, zv den zeiten apt daz dem heiligenchrevtze Vnd der Samnvnge gemaine fvrbaz ledichlichen vnd vreilichen ze haben, vnd allen irn frumen da mit ze schaffen, verchauffen versetzen vnd geben, swem si wellent an allen irresal. Vnd sein avch wir der selben gvlte mit allen vnsern erben der vorgenanten herren rechter gewer vnd scherm fvr alle ansprach als lehens recht ist, vnd des Landes recht ze Osterreich. Waer aber, daz si an derselben gvlte dehain chrieg oder ansprach gewonnen von vns oder von ieman anders, da von si schadhaft wurtten, daz svln wir in mit gvten willen alles auzpringen an alle ir mve vnd irn schaden ablegen. Daz lob wir in ze laisten mit vnsern truwen. Vnd svln avh si daz haben auf vns vnd auf allem vnserm gvt, daz wir haben in dem lande ze Osterreich, wir sein lemtich oder tot. Daz diser chauf furbaz also staet vnd vnverwandelt beleibe, dar vber geben wir in disen prief zv einem offen vrchunde vnd ze einem waren gezevge vnd zv einer ewigen Vestnvnge diser sache versigilten mit vnser paider insigiln Vnd mit vnsers lehenherren insigil, herrn Otten des Tuerssen von Rauchenekke vnd mit herrn Jansen insigil seins svns, Die diser Sache gezevg sint mit ir paider insigiln. Der prief ist geben nach Christes geburt vber drevtzehen hvndert iar in dem Dreitzigisten iar darnach, an dem Pluemoster Abent.

Source Fulltext: WEIS, Heiligenkreuz (=FRA II/16, 1859) S. 133-134