Ich Reimprecht an dem Hormarchte vnd ich Katrey sein Hausurowe vnd vnser erben Wir vergehen vnd tun chunt allen den, die disen brief lesent oder horent lesen, di nv lebent vnd hernach chu^emt sint, Daz der erber herre her Otte hern Otten Su^en, hern Haymen Eninchel, den baiden got genade, Gechlagt hat auf vnser Haus, daz da leit an dem Hormarichte, ze naehst hern Engelprechtes haus Meinhartes aydem dez Panken, Vor rechtem gerichte in der Purger Schranne ze Wienne, Vnd hat so lange gechlagt, vntz daz er auf dem egenanten haus vor rechtem gerichte mit vrage vnd mit vrtail erlangt vnd behabt hat fu^enf vnd achtzich phunt wienner phenninge, Vnd die im vor rechtem Gerichte mit vrage vnd mit vrtail recht vnd redleich ertailt vnd geuallen sint. Der selben fu^enf vnd achtzich phunt wienner phenninge hat er vns gaentzleich begeben vnd ledich lazzen vor aller ansprach also mit ausgenomener rede, daz der vorgenant her Otte mit vnserm guten willen beschaiden hat, daz wir durch got vnd durch vnser Sel willen vnd durch vnsers Suns Jörgen willen vns dez mit vnsern trewen verlu^ebt vnd verpunden haben gegen den erbern Gaestleichen herren Pru^eder Jacoben, zu den zeiten apt datz dem heiligen Chrevtz vnd der Samnunge gemain daselbens vnd allen iren nachchomen also, daz si daz recht Ebichleichen haben suln, daz si aus irm hof daz wazzer laiten suln durch daz egenant vnser haus, daz da leit an dem Hormaricht, an vnsern schaden also beschaidenleich, ob daz waer, daz die Rinne zepraest vnd daz daz wazzer enneben daraus gienge oder vber sich oder vnder sich vns ze schaden, daz suln si vndersten vnd wenten mit ir selbers gut vnd mit ir phenninge. Vnd suln auch wir vnd vnser erben, oder swer daz vorgenante haus nach vns besitzet Pru^eder Jacoben zu den zeiten apt datz dem Heiligen Chreutz vnd der Samnunge gemain daselbens vnd allen irn nachchomen fu^erbaz Ewichleich daran nimmer mer nicht enirren, noch dehainen Chriege noch Irresal daran nicht entu^en. Vnd daz disev sache furbaz ewichleichen also staet vnd vnzerprochen beleibe, darvber so haben wir geben dem egenanten bruder Jacoben, zu den zeiten apt daz dem Heiligen Chreutz vnd der Samnung gemain da selbens vnd allen irn nachchomen disen brief ze einem offen vrchunde vnd zu einem warn gezeuge vnd zu einer ewigen vestnunge diser sache, versigilten mit vnserm Insigil vnd mit vnsers Gruntherren Insigil, hern Jansen dez Greyffen, vnd mit dez egenanten hern Otten Insigil vnd mit hern Chunrades Insigil, hern Johans sun, die diser sache gezeuge sint mit irn Insigiln vnd ander frume leut genunch, den disev sache wol chunt ist. Diser brief ist geben ze wienne, do von Christes gepurt warn ergangen Dreutzehen hundert iar in dem ayn vnd Dreizgistem iar dar nach, des vreytages an dem achten Tage nach sant Peternellen Tage.

Source Fulltext: WEIS, Heiligenkreuz (=FRA II/16, 1859) S. 146-148