Ich Jans der Tůrs van Rauheneke vnd ich Katrei sein haus-vrov verichen vnd tun chund alle den, di disen Prief lesent oder ho^erent lesen, di nv sint vnd hernach chumftig werdent, Daz wir vnuerschaidenlich vnd mit vnser vreunt gutem willen vnd rat vnd mit gesampter hant, ze den zeiten, do wir es wol getun mochten, haben verchauft den erbern gaistlichen leuten, pruder Wulfingen ze der zeiten Apt vnd der Samnunge gemain ze dem Heiligen Chreutz drev phunt gult wienner phenning vnd zwainzig metzen haber gult vnsers rechten Chaufgutes vmb ains vnd zwaintzig phunt vnd ain halbphunt wienner pheninge, der wir gar vnd gainzleih gewert sein; vnd die gult ist gelegen als hernach geschriben stat. Des ersten ze Getzendorf zwelf schilling van drein viertailen, di Symon dient, zwier in dem iar ze sand Mychels misse, sehs schilling vnd ze sand Georgen misse sehs schilling. Ruger van Spannberch sehs vnd dreizig phenning van ainer hofstat ze sand Michels misse vnd ze Leutosdostal Leopold der Tretter vnd Menhard der Chaufman vnd der wenig wisent ainlef schilling an sehs phenning vnd zwaintzig metzen habern, die phenning zwier in dem iar ze sand Mychels Misse, zwelf vnd funf schilling, ze sand Georgen misse czwelif vnd funf schilling phening vnd ze sand Gilgen misse zwaintzig metzen habern. Wir haben in auch di vorgenante gult gigeben mit allem dem nvtz vnd rechten ze verchauffen, ze versetzen vnd allen iren vrumen da mit ze schaffen, als wir sei lange zeit in gewer vnd gewalt haben gehabt. Wir setzen vns auch vber di vorgenanten gult ze rechtem scherm vnd gewer den vorgenanten herrn für alle ansprach, als des Landes re^eht ist ze Ostereich, vnd swas sey Chrieg dar vmb angieng, den schulten wir in auzrichten an alle ir mv^e, ez sei habtgu^et oder schaden, den si nemen van dem Chrieg, vnd schulten daz haben auf vns vnd auf allen dem gu^et, daz wir haben in dem Lande ze Ostreich. Vnd das diser Chouf stet vnd ewig beleib, so gib ich vorgenanter Jans der Turse van Rauheneke den vorgenanten herren ze dem Heiligen Chreutze disen prief ze einem ewigen vrchund versigelten mit meinem ynsigel vnd mit meines geswein ynsigel, herrn Perchtoldes des Losenstainers, der sein damit getzeug ist. Diser prief ist gigeben nach Christes gepůrd vber dreutzehenhundert Iare darnah in dem vier vnd dreizi-gistem Iar, ze Phingesten.

Source Fulltext: WEIS, Heiligenkreuz (=FRA II/16, 1859) S.160-161