Wir Hainreich von gotes genaden Pfallentz Graf ze Reyn vnd Hertzog in Bayern veriehen vnd tu^en chvnt offenbar an disem brief allen den, di in ansehent oder ho^erent lesen, Wan vns der ersam Abbt vnd der Conuent ze dem Heiligen Chreutz in Osterreich geinnert vnd bebeist habent mit gu^eten vnzerbrochen vrchunden vnd Hantuesten, di si von vnserm Vater Hertzog Stephan in Bayern vnd von vnserm Vettern Chu^enig Otten ze Vngern, dem got genad, gehabt habent vmb ein vreyung, also daz si alle Iar ze ainem mal zwai phvnt weites Saltzes an vnsern Mauten ze Purchhausen vnd ze Schaerding frey vnd ledich an all Mautt vodrung vnd irrung fu^er fu^eren mu^egen vnd schu^ellen, ze der zeit vnd ez mit gewonhait her ist chomen vnd als di brief sagent di si von vnsern vodern darv^eber habent. Da von wellen wir vnd gebieten vnsern Vitztumen, vnsern Richtern vnd gemainleichen allen vnsern Amptlaeuten vnd allen vnsern Edeln Laeuten, besunderleichen vnsern Mautnern ze Purchhausen vnd ze Schaerding vnd allen den, di in vnserm Lande gesezzen sint, bei vnsern hulden vestichleichen, daz ir den vorgenanten Abt vnd daz Conuent ze dem Heyligen Chraeutz in der vorgenanten freyung mit nichtev irret, laidigt, enget, noch beswaert vnd fu^edert si an den vorgenanten sachen, dez wellen wir nicht enbern. Wir wellen auch, swer di vor genante freyung von iren wegen fu^ert, oder swem si di selben enphelhent oder verchauffent, daz der oder diselben di vorgenante Freyung fu^er fu^eren su^ellen an alle beswaerung vnd vodrung in all dem rechten, als si selben. Vnd daz in daz staet vnd vnzerbrochen beleib, dar v^eber ze ainem vrchu^ende geben wir in disen brief versigelt mit vnserm Insigel. Der gegeben ist ze Wienn an sant Valantini tag Millesimo CCC^mo Tricesimo Quinto.

Source Fulltext: WEIS, Heiligenkreuz (=FRA II/16, 1859) S.164-165