Ich Wernhart auz den Tuern Purger in der Neuwenstat vergich offenbar an disem prief allen leuten gegenburtigen vnd chunftigen, Daz mein Vo^edern von besunder andacht aynualtichleichen durch got vnd durch selichait irr sel habent geschaft eyn phunt wienner phenning gelts, des eyn halb phunt leit auf Vron Wendeln der vragnerin, zv den zeiten Wytbe haus vnd auch auf gartlant, daz dar zu^e gehort, gelegen vo^er Wienner Purgtor ze nast des Mospruner haus, vnd eyn halb phunt auf Vron Margreten der Pyscholfinn haus vnd auf gartlant, daz dar zu^e geho^ert, gelegen ze nast der egenanten Vron Wendeln haus, also beschaidenlich, daz ich, oder swer daz phvnt gelts nach mir innhat, iaerleichen dar vmb chauffen sol leinein tuech oder chotzen, als verr di phenning getzichent. Vnd sol daz geben in das Spital zv dem Heyligen Chreutz ze trost vnd helf den armen siechen. Waer auer, daz ich, oder swer di gult inn hat, den siechen di genad vnd den tro^est vertziehen wolten, so sol sich der Spitalmaister des egenanten Chlo^esters derselben gult vnderwinden vnd sol mit gewizzen dar vmb leynein tuech oder chotzen chauffen, als verr di phenning getziehent, Vnd sol di arm siechen vnuertzogenleichen damit tro^esten. Man sol auch daz egenant phunt gelts iaerleichen dienen zv driu zeiten in dem iar‚ an sand Gorgentag achtzech phenning, an dem Phyingstag achtzig phennig, an sand Merteins tag achtzich phenning. Der vorgenanten red vnd des geschaeftes ist der prief gesigelt mit meim Insigel vnd mit des Erbern mannes Insigel, hern Petreins des Leinein zv den zeiten richter in der Neunstat ewichleich vrchund vnd getzeug. Der prief ist geben nach Christs gepu^erd Dreutzehen Hundert iar, vnd in dem Siben vnd Dreizgisten iar, des nasten Mitachs vor sand Margreten Tag.

Source Fulltext: WEIS, Heiligenkreuz (=FRA II/16, 1859) S.170