Ich Vlreich der Chrophel vnd mein Hausfrow vnd alle vnser Erben, vnd ich Peter der Indig vnd mein Hausfrow vnd vnser Erben, Vnd ich Nyclas der Walich vnd mein Hausfrow vnd vnser Erben, Wir vergechen vnd tun chund allen den, die diesen Prief lesent vnd Horent Lesen, di nv Lewent vnd hernach chvnftich werdent, Daz wir recht vnd redleich mit verdachten mut vnd mit gemain rat vnd mit gutleichen willen vnd mit gesampter Hant ze der zeit, do wir ez mit recht wol getuen mochten, ze chauffen geben haben Dem Erbern Geistleichen Herren Apt Leupolten ze dem Heyligen Chreutz vnd der Samenvng Gemain des selben Chlosters Vnsern Hof datz dem Winden mit alle den vnd dar zv gehort ze veld vnd ze dorf, wi so datz genant ist, daz wir emaln ze rechtem Perchrecht von in gehabt haben, Vm fvmf vnd virtzich phunt Wienner phening, der wir gar vnd gantz verriht vnd gewert sein, Also mit auzgenomer red, daz die vorgenanten Herren von dem Heyligen chreuz den egenanten hof daz den Winden mit alle dev vnd dar zve gehort, wie so datz genant sey, Ledichleich vnd vreileich haben schullen in Nutz vnd in gewer vnd allen irn frum damit schaffen, mit verchauffen, mit versetzen vnd geben, wem sev wellen an allen chrieg vnd an allen Irrsal. Vnd sein auch wir, ich vorgenanter Vlreich der Chrophel, vnd ich Peter der Indig vnd ich Nyclas der Walch, des vorgenanten Hofs datz den Winden vnd alles des vnd dar zve gehort, ze veld vnd ze dorf, wi so daz genant ist, recht gewern vnd scherm für alle ansprach iederman besunderleich für sich selb vnd für alle seine erben als Purchrechts recht ist vnd des Landes recht ze Ostreich. Vnd durich pezer sicherhait, so setz ich mich Stephan Chrophl für meins Vater dritail ze rechtem scherm fur alle ansprach für mich vnd für mein erben vnd für meins vater erben alle, sev sein vogtper oder nicht als Purchrechts recht ist in dem Land ze Osterreich. Vnd datz dise red vnd dise sach fürbaz alle also stet vnd vnzebrochen beleib, darvber gib ich vorgenanter Vlreich der Chrophel, disen prief zv einen offen vrchund vnd zv einem warn gezeug diser sache versigelt mit meinem Insigel. Vnd wand ich vorgenanter Peter der Indig vnd ich Nyclas der Walch vnd ich Stephan der Chrophel Purger ze Prukk pey der Leyta aigener Insigel nicht haben, so geb wir auch disen prief zv einem offen vrchund vnd zv einem waren gezeug diser sache, versigelt mit vnser Stat Insigel vnd mit des Erbern mans Insigel, hern Jansen von Praitenprunne, der diser sache gezeuge ist mit seinem Insigel. Der Prief ist geben nach Christes geburd Dreutzehen hundert Iar darnach in dem sechs vnd virtzkistem Iar, an dem Pluemoster Abent.

Source Fulltext: WEIS, Heiligenkreuz (=FRA II/16, 1859) S. 197-198