Wir Johanns grave zu Schawnberckg bekennen mit disem brieve, daz fu^er uns ko^emen die ersamen geistleichen unser sunder lieb und ande^achttig .. der abbt und der convent des gotzhawss zum Heiligen Kre^awtz in O^esterreich und zaigten uns ir brieve und urkund, die sy von unsern vorvordern und anheren grafen zu Schawnberg lo^ebleicher gede^achtnu^esse haben, die da ausweisen, daz sy den benanten .. dem abbt und convent des benanten gotzhawss und allen i^ern nacko^emen durch i^er, irer vorvordern und nacko^emen sele hail willen die genad getan haben, daz sy je^arleich zu ainem mal zway pfunt saltz des grossen pants und ku^eeffen zu Aschach an unserr mautt mauttfrey und an all ander hindernu^ess furfu^ern sullen und mu^egen und darumb sy jerleich ainen ewigen jartag halden und begeen sullen, und baten uns diemu^etichleich durch Got, daz wi^er anse^ahen solich unserr vorvordern gute und lobwirdige werich und in dieselben gnad und freyung ze beste^atten. Und wann wir alczeit genaygt und willig sein, unserrr vorvordern gu^ette^at alczeit ze mern und nicht abczenemen, dadurch und voran lautter durch Got, aller unserr vorvordern, unser und unserr nackomen sele hail und auch durch irer diemu^ettigen bet und andacht willen haben wir in dieselben brieve und urkund vernewt und beste^att, vernewen und beste^atten in die auch wissentleich mit kraft des brieves, also daz dieselben vorgenanten geistleichen le^awt und all ir nacko^emen den benanten gotzhaws zum Heiligen Kre^awcz nu furbas von uns, unsern erben und nackomen die gnad haben sullen, daz sy je^arleich im jar ainst zway pfunt kueffen salcz des weiten pants an unserr mautt zu Aschach ledichleich und freyleich an alle mautt und zol und an alle andre vordrung und i^errung furfu^ern sullen und mu^egen, doch daz sy uns, allen unsern vorvordern, nacko^emen ain jartag in irm gotzhaws jerleich und ewichleich halden und begeen sullen, als sy sich des dann besunder gegen uns verschriben und verphlicht haben ongeve^ar. Davon gepieten und emphelhen wi^er allen unsern mauttern, richtern, zolne^arn und allen andern unsern ambtle^awten, gegenwu^erttigen und kunftigen, daz i^er sy bei so^elichen gnaden und freihaiten genczleich beleiben lasset, in daran dhain beswe^arung noch i^errung nicht tu^et noch nyemand gestatt ze tu^en. Das maynen wir ernstleich. Und des zu urkund geben wir in den brieve, besigelten mit unserm anhangunden insigel.||
Geben zu Wienn an suntag vor sand Jacobs tage, nach Cristi gepu^erde virtzehenhundert jar, darnach in dem dreyssigisten jare.