Ich Mert Krame^ar, ich Peter Smid, baid gepruede^ar, und ich Helen ir swester, Niclasen des Schuster hausfrau, gesessen ze Sweinwart, vergehen fur uns und all unser erben und tun chund offennlich mit dem brief allen, den er furchumbt, das wir mit guten willen und wolbedachtem mut, zu der czeit, do wir das wol getun mochten, uns genczlichen verczigen und furczicht getan haben und verczeihen auch uns wissentlich mit chrafft des gegenwurttigen briefs gegen dem erwirdigen geistlichen herren hern Hainrichen abbt des goczhauss zum Heiligen Kre^aucz, dem convent gemain daselbs und iren nachcho^emen und gegen irn holden Jorgen dem Mu^ellner und seinen erben ainer muel mit irr angehorung, gelegen in Nydersulczer pharr niderhalb Erdprust, genant die Huetterinn, der die egenanten geistlichen herren gruntherren sein und unser rechts vaterlich erb gewesen ist, also das wir und all unser erben noch ander yemants von unsern wegen im fu^erbaser hincz den egenanten geistlichen herren und irm goczhaus noch czu dem egenanten Jorgen Mu^ellner und allen seinen erben noch hincz andern des goczhauss holden von der yeczgemelten mul und aller vergangen sachen, wie sich die von der yczgenanten mul wegen uncz auf heutigen tag verlauffen habent, nichts ausgenomen, kainerlay zuspruch noch vordrung nicht mer haben noch gewynnen sullen noch wellen, weder mit worten noch mit werrchen, mit recht noch an recht, vil noch wenig, in dhainerlay weis, an alles geve^ar, sunder sy sullen und mugen nu und hinfu^er mit derselben mul und irr czugehorung hanndeln und tun, wes sy verlusst, an alle irrung und hindernuss, wann sy uns darumb ain ganczes benu^egen getan und darumb achczig phunt phening ausgericht habent, doran uns wol benu^egt und hinfur benugen sol an alles widersprechen ungeverlich, und dasselb gelt der edel unser genediger herr her Hanns von Ku^enring an unserr stat czu unsern hannden ingenomen hat.||
Und des czu urchund geben wir fur uns und all unser erben in den brief, besiglten mit des benanten unsers genedigen herren hern Hannsen von Ku^enring und des edelen Kristoffen des Frawndorffer anhangunden insigln, die wir czu geczeugnuss der sachen mit vleis darumb gepeten haben, in und irn erben an schaden, dorunder wir uns mit unsern trewn verpinden stetczuhaben alles das, so vorgeschriben stet, der geben ist ze Wienn an eritag vor sand Jo^ergen tag, nach Kristi gepurd virczehenhundert jar, darnach in dem newnunddreissigistem jare.