Fridreich von Gots gnaden Romischer kunig, zu alln czeiten merer des reichs, herczog zu Osterreich und zu Steyr etc.||
Ersamen gelertten lieben ande^achtigen und getre^awen, uns ist angelanngt, wie unser vetter ku^enig Albrecht loblicher gede^achtnußess ein freyhait geben hab, daz in unserm furstlichen collegii zu Wienn albeg am mynnisten sechs maister, der drey aus unserm furstentumb O^esterreich und die anndern drey aus anndern unsern erblannden geboren sein sullen,¹ dieselb freyhait aber yecz nicht gehalten werde und sunder von der maister wegen aus Steir, Kernden und von der Etsch etc. geboren, das uns nicht gevellet. Also empfehlen wir ew und begern mit sunderm ernst und fleyzz, daz ir die yeczgemelten maister derselben unserr universitet aus unsern obgenanten lannden Steir, Kernden, Krain und von der Etsch geporen bey solichen unsern und irn freihaitten und rechten yecz und auch hinfur behaltet und zu behalten bestellet nach innhalt so^elher aufseczung und ordnung, so unser vorvordern herczogen zu Osterreich darumb getan haben. Daran tu^et ir genczlich unser maynung und gut gevallen.||
Geben zu der Newenstat an freitag vor dem suntag, so man singt Invocavit in der vasten, anno Domini etc. xliii^o, unsers reichs im dritten jare.