Eugenius episcopus, servus servorum Dei, venerabili fratri episcopo Chiemensi salutem et apostolicam benedictionem.||
Dum ad preclaram fidei constantiam eximieque devotionis affectum, quibus carissimus in Christo filius noster Fridericus rex Romanorum illustris nos et Romanam ecclesiam prosequitur, nostre considerationis aciem convertimus, dum insuper laudabilia virtutum merita, quibus ipsum divina illustravit clementia, paterna meditatione revolvimus, dignum profecto debitumque censemus, ut ea sibi favorabiliter concedamus, per que sue persone multiplicetur honor fidelesque sibi persone uberioris valeant provisionis beneficio consolari. Hac igitur consideratione moti, aliis etiam pluribus suadentibus legitimis causis, dicti regis in hac parte supplicationibus inclinati fraternitati tue, reservandi devotioni tue auctoritate nostra hac vice dumtaxat pro centum personis ecclesiasticis ydoneis, quas ipse rex tibi duceret nominandas, etiam quecunque, quotcunque et qualiacunque beneficia ecclesiastica obtinentibus et expectantibus totidem beneficia ecclesiastica cum cura et sine cura, canonicatu et prebenda ac dignitate, personatu, administratione vel offitio in eadem ecclesia pro unico dumtaxat beneficio computatis, in terris et dominiis hereditariis dicti regis consistentia, etiam si canonicatus et prebende, dignitates, personatus, administrationes vel officia in metropolitanis aliis cathedralibus seu collegiatis ecclesiis fuerint et ad dignitates, personatus, administrationes vel officia huiusmodi consueverint qui (!) per electionem assumi eisque cura immineat animarum, dummodo aliquod beneficiorum ipsorum in metropolitana seu cathedrali post pontificalem maior vel collegiata ecclesia principalis dignitas seu dispositioni apostolice reservatum non fuerit, quorum quidem beneficiorum singulorum videlicet fructus, redditus et proventus, si cum cura, sexaginta, si vero sine cura fuerit, quadraginta marcharum argenti secundum taxationem decime valorem annuum non excedant, ad cuiuscunque seu communiter vel divisim quorumcunque collationem, provisionem, presentationem, electionem seu quamvis aliam dispositionem pertinentia, si qua in terris et dominiis ipsis tempore reservationum huiusmodi aut in ante, simul vel successive vacaverint, que persone huiusmodi per se vel procuratores suos ad hec ab eis spetialiter constitutos infra [ ... ]¹ spatium, postquam sibi vel eisdem procuratoribus vacatio illorum innotuerit, duxerint acceptando conferenda, singula videlicet singulis eisdem personis, pro quibus illa reservaveris post acceptationem huiusmodi cum omnibus iuribus et pertinentiis ac etiam illis et personis predictis, quibus volueris, et ipsarum ecclesiarum [ ... ]s² cum plenitudine iuris canonici eadem auctoritate providendi ac faciendi personas ipsas aut earum procuratores suis nominibus in canonicos recipi et in fratres stallo sibi in choro et loco in capitulo ipsarum ecclesiarum cum dicti iuris plenitudine assignatis, inhibendi quoque districtius locorum, in quibus huiusmodi beneficia forsan fuerint, ordinariis ac dilectis filiis ipsarum ecclesiarum capitulis nec non illi vel illis, ad quem vel ad quos ipsorum beneficiorum collatio, provisio, presentatio, electio seu quevis alia dispositio communiter vel divisim pertinet, ne de illis interim etiam ante acceptationem eandem, nisi postquam constiterit, quod persone vel procuratores predicti illa noluerint acceptare, disponere quoquomodo presumant et nichilominus beneficia huiusmodi, que reservabis, si vacant vel cum vacaverint ut prefertur, eisdem personis conferendi et de illis etiam eis providendi, inducendi quoque eadem auctoritate per te vel alium seu alios easdem personas vel suis nominibus eorum procuratores in corporalem possessionem beneficiorum iuriumque et pertinentiarum predictorum et defendendi inductos ac faciendi personas vel procuratores huiusmodi ad ipsa beneficia, ut est moris, admitti sibique de illorum fructibus, redditibus, proventibus, iuribus et obventionibus universis integre responderi, contradictores auctoritate nostra appellatione postposita compescendo, non obstantibus constitutionibus et ordinationibus apostolicis ac de certo canonicorum numero et aliis ecclesiarum huiusmodi iuramento confirmatione apostolica vel quacumque firmitate alia roboratis, statutis et consuetudinibus contrariis quibuscumque aut si aliqui apostolica vel alia quavis auctoritate in eisdem ecclesiis in canonicos sint recepti vel ut recipiantur insistant seu si super provisionibus sibi faciendis de huiusmodi sive aliis beneficiis ecclesiasticis in illis partibus spetiales vel generales dicte sedis vel legatorum eius litteras impetrarint, etiam si per eas ad inhibitionem, reservationem et decretum vel alias quomodolibet sit processum aut si ordinariis et capitulis prefatis vel quibusvis aliis communiter vel divisim a dicta sit sede indultum, quod ad receptionem vel provisionem alicuius minime teneantur et ad id compelli aut quod interdici, suspendi vel excommunicari non possint quodque de huiusmodi vel aliis beneficiis ecclesiasticis ad eorum collationem, provisionem, presentationem, electionem seu quamvis aliam dispositionem coniunctim vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mentionem et qualibet alia dicte sedis indulgentia generali vel spetiali cuiuscunque tenoris existat, per quam presentibus non expressam vel totaliter non inserta effectus huiusmodi gratie impediri valeat quomodolibet vel differri et de qua cuiusque toto tenore habenda sit in nostris litteris mentio spetialis, seu si persone ipse presentes non fuerint ad prestandum de observandis statutis et consuetudinibus ecclesiarum, in quibus huiusmodi beneficia fuerint, ut prefertur, solita iuramenta, dummodo in absentia sua per ydoneos procuratores et, cum ad ecclesias ipsas accesserint, corporaliter illa prestent plenam et liberam, tenore presentium concedimus facultatem. Ceterum ut personis, pro quibus beneficia predicta reservaveris, citius et facilius provideatur, volumus et auctoritate nostra decernimus, quod persone ipse in beneficiorum, que pro ipsis vigore presentium reservaveris, assecutione quibusvis aliis personis cuiuscunque dignitatis, status, gradus, ordinis aut conditionis existant, beneficia ipsa, quarum ius aliarum gratiarum expectativarum aut facultatum seu nominationum quibusvis prelatis, ordinariis aut aliis secularibus principibus per nos seu auctoritate nostra sub quacunque verborum forma etiam motu proprio sub pari vel maiori dato concessarum et in antea forsan concedendarum vigore expectantibus, sancte Romane ecclesie cardinalibus dumtaxat exceptis, preferantur, non obstantibus, si expectantes ipsi in eisdem ecclesiis in canonicos auctoritate nostra sint recepti aut in processibus diligentiores existant nec non quibuslibet privilegiis, prerogativis, antelationibus, indultis, ordinationibus, exceptionibus, statutis et concessionibus per nos seu sedem predictam hactenus quibusvis collegiis, universitatibus, communitatibus aut personis etiam Romanam curiam sequentibus et in ea presentibus, etiam postquam ipsam curiam per sex menses continue secuti fuerint; nec non ad instar nonnullorum nostrorum familiarium continuorum commensalium in quodam libro cancellarie apostolice descriptorum etiam motu simili concessis et in antea concedendis gratiis factis quoque et faciendis forsan per nos super privilegiis, prerogativis, antelationibus, facultatibus, concessionibus, gratiis et aliis premissis declarationibus nec non omnibus et singulis in eis ac aliis premissis contentis clausulis derogatoriis ac aliis, per quas expectantes aliquos ad ius commune cum aliis expectantibus reduximus, concessimus aut concedemus, aliisque adiectis decretis irritantibus nec non de beneficiis huiusmodi quibusvis ecclesiis, dignitatibus, mensis, capitulis, fabricis aut locis aliis factis, que suum nondum sortite sunt effectum et imposterum forsan faciendis unionibus etiam si de illis, quorum omnium formas et tenores pro expressis haberi volumus de verbo ad verbum, nec non nominibus et cognominibus personarum, universitatum, collegiorum, unionum, prelatorum, ordinatiorum et aliorum predictorum spetialis ex expressa presentibus habenda foret mentio et que omnia et singula quatinus effectui presentium adversari possent, tenore presentium suspendimus, eis alias in suo pleno robore permansuris, constitutionibus quoque et ordinationibus apostolicis nec non ecclesiarum seu locorum, in quibus huiusmodi beneficia forsan fuerint, similiter roboratis, statutis et consuetudinibus ceterisque contrariis quibuscunque. Volumus insuper, quod singule ex personis ipsis, quibus reservanda beneficia huiusmodi contuleris, quamprimum illorum possessionem fuerint vigore presentium pacifice assecute, nisi super hoc alias dispensationes eis apostolice suffragentur, alia cum ipsis assecutis incompatibilia beneficia, que tunc obtinuerint et que ex tunc vacare decernimus, omnino dimittere teneantur nec non gratie expectative, quarum vigore similia incompatibilia beneficia aceptaverint et processus habiti per easdem ac quecunque inde secuta, quoad ipsa incompatibilia dumtaxat sint, cassa et irrita nulliusque roboris seu momenti, quodque de nominibus et cognominibus personarum et beneficiorum nec non de diebus collationum huiusmodi gentes camere apostolice aut collectorem seu succollectorem fructuum et proventuum eidem camere debitorum in illis partibus quantotius certificare procures. Verum quia difficile foret huiusmodi presentes litteras ad singula, in quibus de eisdem forsan fides facienda fuerit, loca defferre, eadem auctoritate decernimus, quod earum transsumpto manu publica et tuo aut alicuius cathedralis ecclesie sigillo munito tanquam originalibus litteris plena fides adhibeatur et perinde stetur, ac si dicte originales littere forent exhibite vel ostense, ac ex tunc irritum decernimus et inane, si secus super hiis a quoquam quavis auctoritate scienter vel ignoranter contigerit attemptari.||
Datum Rome apud Sanctum Petrum, anno incarnationis Dominice millesimo quadringentesimo quadragesimo quinto, tertio Non. Februariis, pontificatus nostri anno quinto decimo.