Nos Sigismundus dei gratia abbas monasterii Sancti Pauli in Valle Laventin. ordinis sancti Benedicti Salzburgen. dioecesis praesentium inspectoribus notum facimus universis, quod reverendus in Christo pater dominus d. Johannes abbas Victoriensis coram nobis personaliter comparuit et literas Reverendi patris ac domini Johannis abbatis Cistercii exhibuit easdem petens per nos vidimari. Sed quia dum eas vidimus, literas tam in sigillo quam carta et verborum tenore prorsus omni vitio carere, eas ad preces dicti domini||
abbatis de Victoria vidimavimus, quarum literarum tenor sequitur et est talis. Nos frater Johannes abbas Cistercii notum facimus universis, quod cum ante aliquot annos venerabilis coabbas noster de Victoria quorundam fratrum sui conventus factione a dignitate abbatiali depositus atque in locum suum alius fuit subrogatus, tandem post diuturnam praedicti abbatis depositi incarcerationem ac alia multa inde secuta virtute rescripti apostolici per deputatos judices etiam apud tribunal caesareae Majestatis praedicti depositi et in locum ejus subrogati abbatis causa examinata et tractata ita conclusum est et determinatum, et interveniente consensu dicti substituti abbatis, sicut et intervenit, prout literis manu propria subscriptis nobis innotuit, alter pridem depositus abbas ad suam pristinam abbatialem dignitatem restitueretur et reponeretur, sicut et de facto tam per commissarium apostolicum quam per consensum et favorem caesareae Majestatis repositus est et restitutus, alio jus quod, utcunque per possessionem acquisivisse praetendebat, accepta quadam pensione sibi assignata resignante. Et quamqnam ista in multis praeter sacri Ordinis nostri statuta et privilegia facta et tractata videantur, scriptorum tamen caesareae Majestatis ac plurium generosorum magnatum ac dominorum intuitu et ne dictum monasterium novis litibus ac tractatibus involvatur, et majora dampna sustineat, nostra et totius Ordinis qua plenaria fungimur, authoritate praelibati fratris coabbatis nostri in locum dignitatis abbatialis restitutionem et alterius cessionem seu resignationem cum omnibus inde secutis confirmavimus, approbavimus et ratificavimus ac praesentium tenore confirmamus, ratificamus et approbamus, salvis in aliis privilegiis et libertatibus Ordinis nostri. Datum in Castro nostro de Corduaco, situm (sic) in Bria sub appensione sigilli nostri die ultima mensis Octobris anno domini millesimo quadringentesimo nonagesimo primo. Harum testimonio literarum nostri sigilli appensione munitarum. Datum nostro in praefato monasterio Sancti Pauli feria secunda post dominicam Letare anno domini millesimo quadringentesimo nonagesimo tertio.

Source Fulltext: Zisterzienser-Chronik 12 (1900) S. 371-372